8 dekabr 2010 02:14
Rəşad Sadıqovun baş məşqçisi Beşiktaş üzərində qələbəyə inanır
Millimizin kapitanı Rəşad Sadıqovun şərəfini qoruduğu Eskişehirspor`un baş məşqçisi Superliqanın əsas favoritlərindən olan Beşiktaş üzərində qələbə qazanacaqlarına inanır. Azerisport.az Türkiyə mətbuatına istinadən xəbər verir ki, o, buna xüsusilə tərəfdarların köməyi sayəsində çatacaqlarının mümkünlüyünü ifadə edib.
Son turun Kayserispor`la səfər qarşılaşmasından sonra istirahətə ehtiyac duymadan Beşiktaş`la ev oyununun hazırlıqlarına start verən eskişehirlilərin çalışdırıcısı ilk məşq öncəsi jurnalistlərə açıqlamasında maraqlı fikirlər söyləyib. Öncə Kayserispor`la qarşılaşmada yaxşı futbol sərgilədiklərini, 3 xalla dönməyi planlaşdırmalarına rəğmən, heç-heçəylə qayıtmaq məcburiyyətində qaldıqlarını vurğulayan Uyğun dövrələrarası fasilə ərəfəsində uğurlu seriyanın davamını gətirmək istədiklərini dilə gətirib:
“Futbolçularımdan çox razıyam. Ortada nəsə xəta varsa, o da mənə aiddir. Ancaq meydanın içində ya da kənarda olmağımın oyunumuza hansısa təsirinin olduğunu düşünmürəm. Tərəfdarımıza və camiəmizə layıq olmağa çalışırıq. Beşiktaş matçı çox ağır keçəcək. İndiyə qədər rəqiblərimizi məğlub edə bilmədik. Beşiktaş qarşısında isə tərəfdarın coşqusu, dəstəyi sayəsində istədiyimiz 3 xalı qazanacağıq”.
