9 dekabr 2010 13:53
“Oyunun taleyi penaltilər seriyasına qalanda biz qalib gələcəyimizə əmin idik”
Turan`ın müdafiəçisi Hüseyn İsgəndərov klubun rəsmi saytına müsahibə verib. Azerisport.az xəbər verir ki, srağagün keçirilən ölkə kubokunun Qarabağ`la oyununda doğum günün qeyd edən futbolçu keçmiş komandasına qarşı forma geyməsindən, sensasion qələbələrindən və hazırkı durumlarından danışıb
- Qarabağ`ı kubokdan kənarlaşdıra bildiz. Komanda yoldaşların doğum günün olduğu üçün bu qələbəni sənə həsr etdiklərini bildirilər…
- Komanda yoldaşlarıma bu hədiyyəyə görə çox sağol deyirəm. Sona qədər layiqli mübarizə apardılar. Biz elə taktika seçmişdik ki, müdafiədə diqqətli olub, əks hücumlarda rəqibi cəzalandırmalı idik. Qarabağ`ın qol imkanları çox oldu. Amma həmin gün idman xoşbəxtliyi bizim tərəfimizdə idi. Oyunun taleyi penaltilər seriyasına qalanda biz qalib gələcəyimizə əmin idik. Çünki Kamal Bayramov oyunboyu hazır olduğunu göstərmişdi. Fərhad Vəliyev isə demək olar ki, əziyyət çəkmədən oyunu başa vurmuşdu.
- Qarabağ`la keçirilən çempionat oyununda zəif çıxış etmişdin. Bu da dedi-qoduya səbəb olmuşdu…
- Məni məşqçi öz mövqeyimdə deyil, sol cinahda oynatdı. Bu futboldur. Həmişə eyni səviyyədə oynamaq mümkün deyil. Qarabağ da mənim üçün doğma klubdur. İstəyirəm ki, bu komanda ilə oyunda özümü sübut edim.
- Turan Premyer Liqada arzulanan mövqedə qərarlaşmayıb…
- Bu mövsüm ilk “altılığ”a düşə bilməsək də, ümid edirəm ki, qış fasiləsində komanda daha da güclənəcək və mümkün qədər üst sıralarda qərarlaşacaq. Kubok yarışlarında da mübarizəmizi davam etdirəcəyik.
- Futbolumuzun hazırdki durumu haqda nə deyə bilərsən?
- Legioner limiti azaldılsa, bizimkilər də oynaya bilərlər. “Altılıq”da mübarizə aparan komandaların heyətinə baxsaq milliləşənləri də nəzərə almaqla, oradakı futbolçuların demək olar ki, hamısı gəlmələrdir. Bu düzgün deyil. Öz futbolçularımız onlardan da yaxşı oynayırlar. Bunu Qarabağ`ın Avroliqadakı oyunları da sübut etdi. Turan`ın heyəti də yerli gənclərdən təşkil olunub. Artıq bu heyətlə komanda kubokda da özünü göstərə bilib. Bir daha vurğulamaq istəyirəm ki, yerlilər heç kimdən zəif deyillər.
