9 dekabr 2010 15:43
Mübariz İbrahimovun xatirəsinə həsr olunmuş turnir başladı (FOTOLAR)
Bu gün Azərbaycan Texniki Universitetinin idman zalında AFFA ilə Azərbaycan Tələbə Gənclər Təşkilatları İttifaqının (ATGTİ) Azərbaycanın Milli Qəhrəmanı Mübariz İbrahimovun xatirəsinə həsr etdiyi mini-futbol turnirinin açılış mərasimi olub.
Azerisport.az xəbər verir ki, tədbirdə iştirak edən AFFA-nın baş katibi Elxan Məmmədov, Gənclər və İdman Nazirinin müavini İntiqam Babayev, Könüllü Hərbi Vətənpərvərlik Texniki İdman Cəmiyyətinin sədri Novruzəli Orucov, Azərbaycan Texniki Universitetinin tərbiyəvi işlər üzrə prorektoru İsa Xəlilov və ATGTİ-nın sədri Şahin İsmayılov çıxış edərək “Milli Qəhrəmanlarımızı tanıyaq və tanıdaq” layihəsi çərçivəsində təşkil olunan turnirin Azərbaycanın ərazi bütövlüyü uğrunda öz canlarından keçmiş şəhidlərin xatirəsini yad etmək, onları gənclərə tanıtmaq baxımından əhəmiyyətindən danışıblar.
Qeyd edək ki, ali təhsil müəssisələrinin tələbələri arasında keçirilən yarışda 24 komanda iştirak edir. İlk oyunda Azərbaycan Texniki Universitetinin və Xəzər Universitetinin komandaları qarşılaşıb. Qarşılaşma Texniki Universitetin 6:0 hesablı qələbəsi ilə başa çatıb.
Fotolar AFFA-nındır
