9 dekabr 2010 11:34
Arif Əsədov Xəzər Lənkaran`la oyunu düşünmür
Neftçi`nin baş məşqçisi Arif Əsədov klubun rəsmi saytına açıqlama verib. Azerisport.az xəbər verir ki, o, həm Gəncə ilə son oyun, həm də qarşıdakı hazırlıq planları ilə bağlı fikirlərini dilə gətirib:
“Gəncə ilə oyunun çətin olacağını bilirdik. Çünki, kubokun bu mərhələsi bir oyundan ibarət idi. Həmin matçın evdə yaxşı təsir bağışlayan Gəncə ilə olması da yaddan çıxmamalıdır. Rəqib döğma meydanında güclü oyun nümayiş etdirir. Bizim ölkə Premyer Liqasında olduğu kimi, kubokda da yeganə hədəfimiz 1-ci olmaqdır. Gəncə ilə görüşdə meydançaya 7 yerli futbolçu buraxdıq. Əgər vurulan qollara diqqət etsəniz görərsiniz ki, 3 qoldan ikisini gənc futbolçularımız Cavid İmamverdiyevlə, Mirhüseyn Seyidov vurub. Bu bizim vacib matçlarda belə gənclərə necə inandığımızı göstərir”.
Arif Əsədov həmçinin qeyd edib ki, Neftçi`də artıq komanda bir mexanizm kimi işləyir: “Yəni bizim oyunumuz hər hansı bir oyunçudan asılı deyil. Mən hər zaman belə sistemin tərəfdarı olmuşam. Bu vəziyyətdə rəqabətdə qalib gələn futbolçu əsas heyətdə oynayır”.
Paytaxt klubunun çalışdırıcısı sonda Xəzər Lənkəran`la növbəti mərhələnin oyununa da toxunub: “Kubokun 1/4 finalında Xəzər Lənkəran`la qarşılaşacağıq. Bu mərhələ iki oyundan ibarətdir. Təbii ki, yeganə hədəfimiz yarımfinala yüksəlməkdir. Lakin, Lənkaran təmsilçisi ilə görüşə hazırlaşmaq üçün xeyli vaxtımız var, hazırda bu oyunu düşünmürük. İndi bütün diqqətimizi Premyer Liqaya yönəltmişik . Artıq bu gündən Bakı ilə növbəti görüşün hazırlıqlarına başlamışıq”.
