10 dekabr 2010 11:07
PFL Premyer Liqanın təqvimində dəyişikliklər etdi
Peşəkar Futbol Liqası Premyer Liqanın cari mövsümünün təqvimində bir sıra dəyişikliklərə əl atıb. Azerisport.az xəbər verir ki, buna, elitada çıxış edən əksər klubların PFL-ə ünvanladıqları məktubda qarşıdan gələn bayramlarla əlaqədar olaraq 19-cu turun oyunlarının daha tez tarixdə keçirilməsini xahiş etmələri səbəb olub.
Qeyd edək ki, hələ bir müddət öncə elita klublarında çıxış edən legionerlər öz ölkələrinə daha tez yollanmaq üçün 19-cu turun oyunlarının daha tez keçirilməsi üçün fəaliyyətə keçmişdilər. Məhz bu səbəbdən PFL prezidenti Ramin Musayev 19-cu turun aşağıdakı oyunlarının 23 dekabr 2010-cu il (cümə axşamı) tarixində keçirilməsinə qərar verib:
Neftçi – Turan
İnter – Gəncə
Xəzər Lənkəran – Qarabağ
Muğan – AZAL
Simurq – MOİK
Bu turun Qəbələ – Bakı görüşü isə 25 dekabr tarixində - şənbə günü oynanılacaq.
PFL prezidentinin digər qərarı ilə Premyer Liqanın 18-ci turunun Qarabağ – Muğan matçı 19 dekabr 2010-cu il tarixindən 18 dekabr 2010-cu il tarixinə keçirilib.
