10 dekabr 2010 23:52
Rəşad Sadıqovun komandası Beşiktaş`a şok yaşatdı (YENİLƏNİB)
Bu gün Türkiyə çempionatında 16-cı turun oyunlarına start verilib. Azerisport.az xəbər verir ki, tur millimizin kapitanı Rəşad Sadıqovun çıxış etdiri Eskişehirspor`la Beşiktaş arasındakı qarşılaşmayla start götürüb. Belə ki, həmyerlimizin komandası doğma azarkeşlərinin gözü qarşısında güclü rəqibi ilə münasibətlərinə aydınlıq gətirib.
Bakı vaxtı ilə saat 22:00-da start götürən qarşılaşmada Sadıqovun iştirakı sual altındaydı. Məsələ burasındadır ki, Fenerbahçe ilə oyunda zədə alandan bəri heyətə qayıda bilməyən həmyerlimizin yalnız növbəti turda oynaması planlaşdırılırdı. Lakin baş məşqçi Bülent Uyğun həmyerlimizin adını matçın iştirak ərizəsinə daxil etmişdi. Buna baxmayaraq, gözlənildiyi kimi, millimizin üzvü bu dəfə də ehtiyatda qaldı. Matça gəlincə, Rəşadın oyundaşları bu dəfə daha böyük uğura imza atıblar. Güclü rəqibin qapısından 2 cavabsız top keçirən eskişehirlilər turun sensasiyayla start götürməsinə səbəb olublar.
Qeyd edək ki, hazırda həmyerlimizin komandası 19 xalla 11-ci, Beşiktaş isə 27 xalla 5-ci pillədə qərarlaşıb.
Eskişehirspor - Beşiktaş - 2:0 (0:0)
Qollar: Veysel Sarı, 62 (1:0), Sezer Öztürk, 79 (2:0).
Matçın 40-cı dəqiqəsində qonaqların ulduz futbolçusu Quti ikinci sarı - qırmızı vərəqə alaraq meydandan qovulub.
