11 dekabr 2010 12:35
Romal Hüseynov: XL-nın zəif yerlərini bilirik və açıq oyun sərgiləyəcəyik
`Gəncə`nin yarımmüdafiəçisi Romal Hüseynov Xəzər Lənkəran`la bu günkü oyun ərəfəsində komandasının şansları barədə danışıb. Azerisport.az saytına müsahibəsində təcrübəli futbolçu bunları dilə gətirib:
“Gəncə` ilk “altılığ”a düşmək istəyir. Buna görə son 6 oyunumuzun hamısında qələbə qazanmalıyıq. Hətta `Xəzər Lənkəran`la da səfər oyununda biz bir xala da razı qalmayacağıq. Düşünmürəm ki, bizə lənkəranlı azarkeşlərin güclü təzyiqi altında oynamaq çətin olacaq. Bizim futbolçularda belə bir kompleks yoxdu. Çünki Gəncədə hər oyunumuza minlərlə azarkeş toplaşır. Elə `Neftçi` ilə son oyunumuzda 20 min tərəfdarımız var idi. Hətta Lənkəran da belə göstəricisinə görə öyünə bilməz. Çünki onların stadionu cəmi 15 min azarkeş tutumuna malikdi”.
Buna baxmayaraq, Hüseynov rəqib komandanın heyətindəki oyunçulardan çəkinmək lazım gəldiyini gizlətməyib: “Xəzər Lənkəran`da hər mövqedə yaxşı oyunçular var. Bu mövsüm onlar əla oyun sərgiləyirlər. Təsadüfi deyil ki, liderlər qrupunda qərarlaşıblar. Bizdə isə təəssüf ki, heyətlə bağlı problemlərimiz var. Ceyhun Sultanovla Xəyal Mustafayev zədə səbəbindən oynaya bilməyəcək. Bundan əlavə XL-nın Kamran Ağayev kimi güclü qolkiperi var. Hansı ki, ona qol vurmaq elə də asan iş deyil. Amma hər şeyə rəğmən biz rəqibdən çəkinmirik. Rəqibin zəif yerlərini bilirik və açıq oyun zərgiləyəcəyik”.
Romal sonda `Neftçi`yə məğlubiyyət haqda da danışıb: “Biz yaxşı oynadıq. Ancaq hakim hər şeyi korladı. Həddən artıq çox fit çaldı. Qərarlarının çoxu `Neftçi`nin lehinə olunca, biz qələbə qazana bilmədik”.
