13 dekabr 2010 20:45
Ermənilər Azərbaycan çempionuna qarşı `Mika`nı göndərir
Azərbaycan çempionu `İnter`in də qatılacağı “Birlik Kuboku”nun bütün iştirakçılarının siyahısı müəyyənləşib. Azerisport.az xəbər verir ki, artıq bir həftədi yarışın təşkilat komitəsinin işlərini düyünə salan Ermənistan Futbol Federasiyası Sankt-Peterburqa göndərməyə klub tapıb.
Məlum olduğu kimi, hələ ötən həftə yarışın püşkatmasını təşkil etməyi planlaşdıran təşkilatçılar son anda son Ermənistan çempionu `Pünik`in imtinası səbəbindən, bu tədbiri təxirə salmaq məcburiyyətində qalmışdılar. Belədə EFF gümüş və bürünc mükafatçılar - `Banants` və `Ulis`ə müraciət etsə də, onlar da bu yarışa qatılmaqdan imtina etmişdilər. Nəhayət bu gün Ermənistan çempionatının 4-cüsü `Mika` “Birlik Kuboku”nda iştiraka razılıq verib.
Hələlik püşkatma mərasiminin nə vaxt keçiriləcəyi dəqiqləşməyən yarışda `Mika`nın son Azərbaycan çempionuyla qarşılaşması da mümkündü. Qeyd edək ki, ənənəvi turnir gələn il yanvar ayının 14-dən 23-dək keçiriləcək.
