13 dekabr 2010 12:26
Millimizin daha bir rəqibi baş məşqçisiz qala bilər
AÇ-2012-nin seçmə mərhələsi çərçivəsində Azərbaycan millisinin rəqiblərindən daha biri - Türkiyə yığması baş məşqçisiz qala bilər. Azerisport.az xəbər verir ki, bu haqda İngiltərə mətbuatı iddia irəli sürüb.
İngilis həmkarlarımız “ay-ulduzlular”ın hollandiyalı çalışdırıcısı Qus Hiddinkin `Chelsea`nin sükanı arxasına keçməkdə olduğunu bildirir. “Daily Mail” nəşri hətta ada təmsilçisinin prezidenti Roman Abramoviçin hazırda işləri heç də yaxşı getməyən Karlo Ançelotti ilə yollarını ayırmağa və Hiddinki onun yerinə gətirməyə hazırlaşdığını yazıb.
Maraq üçün qeyd edək ki, Hiddink, vaxtilə Rusiya millisinin baş məşqçisi olarkən, eyn vaxtda `Chelsea`ni də çalışdırmışdı və bu klub ona doğmadır. 2009-cu ilə təsadüf edən həmin proseslərin təkrarlanıb-təkrarlanmayacağını isə zaman göstərəcək.
Xatırladaq ki, hazırda seçmə mərhələdəki daha bir rəqibimiz – Qazaxıstan yığması baş məşqçisi Bernd Ştorkla yollarını ayırandan bəri sahibsiz qalıb və onlar hələ də yeni məşqçi axtarışlarını davam etdirirlər.
