14 dekabr 2010 14:45
Georgi Nikolov: Azərbaycan klubları üçün bu turnir Çempionlar Liqasıdır
Son Azərbaycan çempionu `İnter`in prezidenti Georgi Nikolovun azerisport.az saytına müsahibəsi
- “Birlik Kuboku”nun püşkünə əsasən komandanız Qırğızıstan `Neftçi`si, Moldova `İskra-Stal`ı və Tacikistanın `İstiklol` klubuyla eyni qrupda yer aldı. Rəqiblərinizi necə dəyərləndirərdiniz?
- Buna dəqiq fikir bildirmək üçün gərək həmin rəqiblər haqda kifayət qədər informasiya toplayaq. Ancaq hələlik bizdə həmin informasiyalar yoxdu. Ancaq biz bütövlükdə Moldova futbolunun vəziyyətini az-çox bilirik. `Şerif` kimi Avropa Liqasında uğurlu təmsilçisi var. Taciklər bu turnirdə ciddi uğurlar qazana bilməsə də, demək olmaz ki, “İstiklol” zəif komandadı. Qırğızlara gəlincə, `Neftçi` adlı komandanın zəif olması mümkün deyil. Deməli yaxşı maliyyə dəstəkləri var.
- Püşkün nəticələrindən sonra siz yəqin ki, Sankt-Peterburqa qələbə dalınca gedəcəyinizi bir daha düşündünüz...
- Biz bu qrupdan lider kimi çıxmaq istəyirik. Bu bizim 1/4 finalda nisbətən zəif rəqiblə düşməyimizə şərait yaradacaq. Ondan sonra isə biz çempionluq haqda düşünə bilərik.
- Razısız ki, sizin qrup digərlərilə müqayisədə ən zəifidi?
- Yenə də deyirəm ki, bu suala cavab vermək üçün bu rəqibləri yaxından öyrənmək çox vacibdi. Təbii ki, `Tobol`, `Skonto`, `Bunedkor` kimi klubların cəmləşdiyi B qrupu daha çətindi. Ancaq biz istənilən halda “Birlik Kuboku”nun qalibi olmaq istəyirik.
- 2009-cu ildəki çıxışınız təcrübə baxımından kömək edə bilərmi komandaya?
- Keçən dəfə təəssüf ki, bizə qələbə qazanmaq nəsib olmadı. `İnter`in ovaxtkı baş məşqçisi Valentin Xodukin hətta Bakıya qayıdandan sonra mənə dedi ki, “Georgi, gələn il bir daha cəhd etmək lazımdır”. Ancaq növbəti il alınmadı və indi də baş məçqçimiz Valentin Mixayloviç deyil. Ancaq bunun elə də ciddi fərqi yoxdu.
- Ümumiyyətlə bu turnir Azərbaycan çempionuna nəyə görə lazımdı?
- Azərbaycan klubları üçün bu turnir Çempionlar Liqasıdır. Buna görə də əsl Çempionlar Liqasında uğur qazanmaq haqda düşünməyimiz hələ çox tezdir.
- Rusiyada baş verən son xoşagəlməz olaylar sizin bu turnirdən imtinanıza səbəb ola bilməz ki?
- Xeyr, biz imtina etməyi planlaşdırmırıq. Əsas xoşagəlməz olaylar onsuz da Moskvada baş verir. Sankt-Peterburqda isə əsl aristokrat ab-havası olur. Həm də mən inanıram ki, Rusiya Futbol İttifaqından olan dostlarımız turnir iştirakçılarının təhlükəsizliyini ən yüksək səviyyədə təşkil edə biləcək. Odu ki, İnter`in “Birlik Kuboku”ndakı iştirakına hansısa dələduzlar mane ola bilməz”.
