14 dekabr 2010 12:47
“Neftçi ilə oyundan sonra baş verənlər məni mənəvi cəhətdən öldürdü”
`Bakı`nın yarımmüdafiəçisi Premyer Liqanın son turunun `Neftçi` ilə oyununda üzləşdiyi qalmaqal və xoşagəlməz hadisəyə münasibətini bildirib. Azerisport.az saytına müsahibəsində o, bunları dilə gətirib:
- Sizin `Neftçi` ilə oyununuzdan sonra hər kəs paltardəyişmə otağında baş verən qalmaqaldan danışır..
- Məni kim tanıyırsa, onlar da sizi inandıra bilər ki, mən necə adamam. Sülhsevərəm, heç vaxt dava-dalaş salmaram. Ancaq `Neftçi` ilə oyundan sonra baş verənlər məni mənəvi cəhətdən öldürdü. Heç vaxt təsəvvür edə bilməzdim ki, Azərbaycanda belə hadisəylə üzləşərəm.
- Nə baş vermişdi ki elə?
- Hər şey oyun vaxtı başladı. Oyunçular arasında toqquşma oldu, mübahisə yarandı. Çünki gərginlik kifayət qədər yüksək idi. `Neftçi`nin futbolçularından biri – nömrəsi 14 idi (Bahodir Nasimovu nəzərdə tutur - red.) – mənə sataşdı və hətta üstümə qışqıraraq, irqçi söyüşlər işlətdi.
- Siz bu haqda kiməsə demisizmi?
- Bəli, mən `Neftçi`nin başqa bir oyunçusuna yaxınlaşdım. Deyəsən onun da nömrəsi 25 idi (Cavid İmamverdiyev – red.). Ona dedim ki, bu şəkildə söyüş söymək olmaz. Axı hər halda mən də müsəlmanam, valideynlərimizin dini inancları var. Ancaq heç kim məni eşitmədi.
- Sizi oyundan sonra kim vurdu?
- Bilmirəm. Oyundan sonra mən paltardəyişmə otağına tələsirdim. Elə bu vaxt eşitdim ki, kimsə məni `neqer` deyə çağırdı. Ona doğru dönəndə sifətimdən zərbə aldım. Onun əllərini tutmaq istəyəndə təpiklə ayaqlarıma zərbə vurdu. Çətin ki, `İnter`ə qarşı oyunda iştirak edə bilim. Əgər məni orda vururlarsa, niyə mən ora gedim, niyə orda qalmalıyam?
- `Neftçi`də artıq günahkarı axtarırlar.
- Sağ olsun `Bakı`nın prezidenti Hafiz Məmmədov. O, oyundan dərhal sonra mənə söz verdi ki, həmin şəxs mütləq cəzalandırılacaq. Nəyə görə məni vurdular, heç özüm də bilmirəm. Ola bilər ki, həmin adamın qaradərililərlə problemi varmış.
- Həkimlər nə dedilər?
- Hələlik bilmirəm. Sağ olsun, hər kəs belə bir vaxtımda mənə dəstək olur. Belə vəziyyətdə adam hər şeyi buraxıb, ölkədən getmək istəyir. Ancaq nə vaxtsa yanında yaxşı insanları görürsən, fikrini dərhal dəyişməli olursan.
