15 dekabr 2010 13:28
Millimiz FİFA reytinqindəki mövqeyini əldən verdi
FİFA dünya yığmalarının növbəti reytinq cədvəlini açıqlayıb. Azerisport.az xəbər verir ki, Azərbaycan millisi bu dəfə 8 pillə geriləyərək, 98-ci sırada qərarlaşıb.
Komandamızın indiyə qədər rekord hesab olunan 90-cı pillədəki mövqeyini əldən verməsinə hesabından 38 xalın silinməsi səbəb olub. Hazırda Berti Foqtsun çalışdırdığı millimizin hesabında 343 xal var.
AÇ-2012-nin seçmə mərhələsindəki rəqiblərimizə gəlincə, Almaniya 1 pillə irəliləyərək, 1485 xalla 3-cü sıraya yüksəlib. Yoahim Lövün komandası 1 pillə geriləyən Braziliyanı qabaqlayıb. Digər rəqiblərimizdəb Avstriya və Belçika da irəliləyib. Avstriyalıları 3 pillə irəliləyərək, 569 xalla 46-cı olubsa, belçikalılar da 5 pillə önə keçib və hazırda 526 xalla 57-cidi. Digər iki rəqibimiz isə komandamız kimi geriləyib. Türkiyə 2 pillə geriləyib və 741 xalla 31-ci pillədədi. Qazaxıstan isə 1 pillə geriləyib, 154 xalla 138-cidi.
Bütövlükdə isə, siyahıya son dünya çempionları İspaniya başçılıq edir (1887 xalla). 1723 xala malik Hollandiya isə ikincidi.
