15 dekabr 2010 16:06
Arif Əsədov son iki oyundan 6 xal istəyir
`Neftçi` Premyer Liqanın 18-ci turunda `Gəncə` ilə qarşılaşacaq. Azerisport.az xəbər verir ki, dekabrın 18-də Gəncə şəhər stadionunda keçiriləcək oyun ərəfəsindən komandanın baş məşqçisi Arif Əsədov klubun rəsmi saytına fikirlərini açıqlayıb:
“Son turdakı məğlubiyyətdən sonra zirvədəki yerimizi itirmişik. Çalışacağıq ki, liderliyi yenidən qaytaraq. Bunun üçün əvvəlcə qarşıdan gələn oyunlarda qələbə qazanmalıyıq. Xal ehtiyatımızı daha da yaxşılaşdırmaq üçün iki qarşılaşmadan 6 xal toplamalıyıq. Qarşıdakı oyunumuza gəlincə, Gəncədəki görüşlər həmişə çətin keçir. Buna dekabrın 8-də `Gəncə` ilə keçirdiyimiz kubok oyununda bir daha əmin olduq. Əsas məqsədimiz qalib gəlməkdir. Düzdür, zədəli futbolçularımız var. Bununla belə, komanda oyuna yüksək əhval-ruhiyyədə hazırlaşır. İnanıram ki, `Gəncə`ni kubok oyununda olduğu kimi, bu dəfə də məğlub edəcəyik”.
