15 dekabr 2010 16:28
Berti Foqts: Təəssüf ki, buna hamı riayət etmir
Bu gün Aeroport oteldə təşkil olunan mətbuat konfransında Azərbaycan milli komandasının baş məşqçisi Berti Foqts millinin təlim-məşq toplanışı barədə fikirlərini bildirib. Azerisport.az xəbər verir ki, almaniyalı məşqçi komandamızın hazırlıq prosesi barədə bunları dilə gətirib:
“Təlim-məşq toplanışının əsas məqsədi son həftələrdə diqqətimi cəlb edən gənc oyunçulara şans verərək, özlərini göstərmələrinə şərait yaratmaqdır. Bundan əlavə, ölkə xaricində çıxış edən azərbaycanlı futbolçuların nəyə qadir olduqlarını nəzərdən keçirirəm. Təkcə Azərbaycanda yox, ölkə xaricində də azərbaycanlı futbolçuların axtarışını davam etdiririk. Toplanışa dəvət olunan futbolçulara karyeralarını inkişaf etdirmələri üçün kömək etməliyik. Hər bir futbolçu klubda və yığmada keçirilən məşqlər arasında fərqi görür. Onlar millidə beynəlxalq səviyyədə məşq edirlər. Yığmaya cəlb olunan yeni futbolçular belə hazırlıq keçməyə indi-indi öyrəşirlər”.
Millimizin çalışdırıcısı futbolçuların hazırlıq səviyyəsindən də danışıb: “Bu oyunçuların məşqlərdə necə görünmələrindən razıyam. Görünür, yığmanın heyətində onlar özlərini Premyer Liqa oyunlarından yaxşı göstərirlər.İstəyirik ki, klublar da məşqləri Avropa standartları ilə keçsinlər. Təəssüf ki, buna hamı riayət etmir”.
Foqts bəzi məşqçilərin onun təlim-məşq toplanışlarından narazı qalması haqda deyilənlərə də münasibət bildirib: “Məşqçilərdən heç kim mənə narazı olduğunu deməyib. Yaxınlarda Qurban Qurbanovla görüşdüm və o, mənə heç nə demədi. Düşünmürəm ki, bu təlim-məşq toplanışı da klubların hazırlığına təsir etsin”.
Almaniyalı mütəxəssis öz iş planlarından da danışıb: “Ümumiyyətlə mənə yığmanın toplanışlarına oyuna 2-3 gün qalmış gəlmək rahat olardı; məşqləri keçirmək, uşaqları oyuna buraxmaq və evə qayıtmaq. Amma bunu mən artıq normal iş hesab etmirəm, mən işləmək istəyirəm. Ümumiyyətlə, hesab edirəm ki, komandaya daha çox toplanış lazımdır. Milli komandaya daha çox gənc oyunçu cəlb etmək lazımdır. Axı biz AÇ-2016-nın final turnirinə düşmək istəyirik. Özü də orada 24 komanda iştirak edəcək”.
“Oyunçular yorulur? Lazım olsa onlar sutkada 24 saata qədər işləməlidirlər. Onlara rəhmi gəlmək lazım deyil, onlar yazıq deyil. Həmin Rauf Əliyev heç də həmişə `Qarabağ`da 90 dəqiqə oynamır. Komandalarımız avrokuboklara qatılmaqla məşğul deyil, çoxu hətta ölkə kubokundan kənarda qalıb. Ona görə də sizə məsləhət görürəm - futbolçulara rəhminiz gəlməsin”, deyə Foqts öyüd verib.
Sonda almaniyalı mütəxəssis hazırkı seçmə mərhələylə də bağlı fikir bildirib: “Düşünürəm ki, AÇ-2012 turnirində biz hələ bir neçə sürpriz edəcəyik”.
