16 dekabr 2010 11:54
Branimir Subaşiç: Heç kimdən və heç nədən qorxmuram
Azərbaycan milli komandasının və `Qəbələ`nin hücumçusu Branimir Subaşiç azerisport.az və “Zerkalo”ya müsahibəsində növbəti zədəsi, Berti Foqtsun sözləri və qarşıdakı AZAL ilə oyun haqda fikirlərini səsləndirib:
- Siz millinin bu dəfəki toplanışından da zədə səbəbindən kənarda qaldınız...
- Elədi ki var. Son iki ayda bu, artıq ikinci dəfədir. Özü də bu zədələr milliyə çağırılmağımla eyni vaxta düşür. Futbolçunun həyatında belə şeylər olur. Artıq məşq etməyə başlamışam. Baxmayaraq ki, ayağımda hələ də ağrılar qalmaqdadı. MOİK-lə oyunda da sona kimi mübarizə apara bilmədim.
- Milli komandanın baş məşqçisi Berti Foqts nə dedi?
- O da təəccübləndi. Hətta yarızarafat soruşdu ki, bunu qəsdən eləmirsən ki? Almaniyalı baş məşqçi həmçinin onu da qeyd etdi ki, zədəmi izləyəcək və tez sağalmağımı arzulayacaq.
- Yanvardakı Dubay toplanışına sizi çağırmağa hazırlaşırmı?
- Bu haqda heç bir söz demədi. Kimisə o çağırıb ki? Hələ bu haqda danışmaq çox tezdi. Hər şey mənim nə dərəcədə formada olmağımdan asılı olacaq.
- Ola bilərmi ki, sizin bu zədələriniz fiziki cəhətdən heç də yaxşı hazırlıqlı olmamağınızdan irəli gəlsin?
- Yox. Baxmayaraq ki, mən mövsümə `Qəbələ`ylə birgə hazırlaşmamışam, amma yenə elə bir problemim yoxdu və ola da bilməz. Ola bilsin ki, süni qazonda məşq etməyimizdən, oynamağımızdandı. Bu zədə amillərini çoxaldır.
- Nəyə görə siz bu mövsüm çox az qol vurursuz?
- Alınmır hələlik. Digər tərəfdən az oynayıram. Hər halda başadüşüləndi.
- Qorxmursunuz ki, `Qəbələ` qış fasiləsində yeni hücumçular alsın?
- İkimənalı sual verirsiniz. Heç kimdən və heç nədən qorxmuram. Əksinə daha yaxşı oynayaram. Heç kim mənim heyətə düşməyimə mane ola bilməz.
- Qarşıda AZAL ilə oyun var...
- Ciddi rəqibdi. Ancaq bu dəfə biz onları məğlub etməliyik.
- Birinci dövrədə bunu etmək mümkün idi? Məncə, onların təhlükəli vəziyyətləri sizdən daha çox olmuşdu...
- Bunu siz belə hesab edirsiz. Mənsə əksinə hesab edirəm. O zaman da `Qəbələ` meydanda daha yaxşı idi və qələbə qazanmalıydı. Biz qələbəyə köklənmişik və rəqibi `Şəfa` stadionunda məğlub etmək istəyirik.
- Təsadüfən AZAL-ı turnir cədvəlində qabaqlamağın planlarını cızmırsınız?
- Hazırda biz onlardan cəmi 4 xal geridəyik. Hələlik o haqda düşünməmişik. Amma istərdik.
