17 dekabr 2010 14:14
Nasimov rəsmən Özbəkistan millisinə çağırıldı
`Neftçi`nin hücumçusu Bahodir Nasimov Özbəkistan millisindən rəsmi dəvət alıb. Azerisport.az xəbər verir ki, özbəklərin dekabrın 18-dən etibarən Birləşmiş Ərəb Əmirliklərində başlayacaq təlim-məşq toplanışına dəvət alan oyunçuların arasında paytaxt klubunun hücumçusunun da adı var.
Nasimov yığmanın heyətində yanvarın 7-dən 29-dək Qətərdə təşkil olunacaq Asiya Kuboku-2011-ə hazırlıq məqsədilə keçiriləcək təlim-məşq toplanışında da iştirak edəcək. Bu haqda Nasimovla baş məşqçi Arif Əsədov arasında olan söhbətdən sonra qərar verilib. Bahodir Özbəkistan yığmasının heyətində təlim-məşq toplanışında iştirak etmək üçün dekabrın 20-də Dubaya yollanacaq.
Qeyd edək ki, Asiya kuboku-2011-də oynayacağından, özbək forvard dekabrın 23-də keçiriləcək Premyer Liqanın 19-cu turunun `Turan`la görüşündə, eləcə də `Neftçi`nin yanvarda Türkiyədə keçirəcəyi təlim-məşq toplanışında çıxış etməyəcək.
Qeyd edək ki, Nasimov məhz Azərbaycan Premyer Liqasının cari mövsümündə rəqib qapılarından 14 qol keçirməklə ölkəsinin millisindən dəvət alıb.
