17 dekabr 2010 12:22
Bu gün Avropa Liqasında pley-off mərhələsinin püşkü atılacaq
Bu gün Bakı vaxtı ilə saat 16:00-da UEFA Avropa Liqasının 1/16 və 1/8 final mərhələsinin püşkatma mərasimi keçiriləcək. Azerisport.az xəbər verir ki, püşkatma ərəfəsində pley-off mərhələsinin iştirakçısı olan 32 komanda iki səbətə yerləşdirilib. Reqlamentə əsasən bu mərhələyə Avroliqanın 12 qrupundan ilk iki yeri tutmuş 24 komanda ilə yanaşı ÇL-in qrup üçüncüləri olan 8 komanda (Moskva `Spartak`ı, Braga, Ajax, Twente, Rubin, Basel, Rangers və Benfica) qatılır.
Püşkatma qaydalarına əsasən 1/16 finalın püşkatması aşağıdakı şərtlər daxilində keçiriləcək:
- Eyni ölkədən olan komandalar bu mərhələdə qarşılaşa bilməz;
- Qrup mərhələsində qarşılaşmış komandalar bir-birinə rəqib ola bilməz.
- ÇL-in qrup mərhələsində ən yaxşı üçüncü nəticəni göstərmiş 4 ən yaxşı komanda (Spartak, Braga, Ajax, Twente) Avroliqanın 12 qrup qalibinin yerləşdiyi 1-ci səbətdə yer alıb. ÇL-in yerdə qalan 4 qrup üçüncüsü isə (Rubin, Basel, Rangers, Benfica) Avroliqa qrup ikincilərinin yer aldığı 2-ci səbətdə qruplaşdırılıblar.
- İkincilər ilk görüşləri öz meydanında keçirəcəklər.
1/16 final mərhələsinin püşkü atıldıqdan dərhal sonra 1/8 final mərhələsinin püşkləri müəyyənləşdiriləcək.
1/8 final:
- Bu mərhələdə komandaların adları deyil, əvvəlki mərhələdə oyun cütlərinin nömrələndiyi kürəciklər rəqibləri müəyyən edəcək. Hər kürəciyə müvafiq sayda “1-ci oyunun qalibi” və “2-ci oyunun qalibi” və sair yazılmış kağız yerləşdiriləcək. Bu kağızlar da gələcək rəqibləri qarşılaşdıracaq. Püşkatma vaxtı 1/8 finalın gələcək iştirakçıları 8 cütlüyə ayrılacaq. Hər cütdə səbətdən cütlük nömrələri ilk çıxan kürəcik sahibləri ilk oyunu evdə keçirəcəklər. Bu mərhələdə komandaların qarşılaşması ilə bağlı heç bir məhdudiyyət yoxdur.
Qeyd edək ki, UEFA Avropa Liqasının final oyunu 2011-ci il mayın 18-də İrlandiyanın paytaxtı Dublin şəhərində “Lansdowne Road” stadionunda baş tutacaq.
UEFA Avropa liqasının 2010/2011-ci illər mövsümü 1/16 final mərhələsinin püşkatması ərəfəsində səbətlərin tərkibi ilə tanış olun:
1-ci səbət
Manchester City (İngiltərə)
Bayer Leverkusen (Almaniya)
Sporting (Portuqaliya)
Villarreal (İspaniya)
Dynamo (Kiyev, Ukrayna)
CSKA (Moskva, Rusiya)
Zenit (Rusiya)
Stuttgart (Almaniya)
PSV Eindhoven (Hollandiya)
Paris Saint-Germain (Fransa)
Liverpool (İngiltərə)
Porto (Portuqaliya)
Spartak Moskva (Rusiya)*
Braga (Portuqaliya)*
Ajax (Hollandiya)*
Twente (Hollandiya)*
2-ci səbət:
Lech (Polşa)
Aris (Yunanıstan)
Lille (Fransa)
PAOK (Yunanıstan)
BATE (Belarus)
Sparta (Çexiya)
Anderlecht (Belçika)
Young Boys (İsveçrə)
Metalist (Ukrayna)
Sevilla (İspaniya)
Napoli (İtaliya)
Beşiktaş (Türkiyə)
Rubin (Rusiya)*
Basel (İsveçrə)*
Rangers (Şotlandiya)*
Benfica (Portuqaliya)*
Qeyd: Adlarının qarşısında * işarəsi olanlar Çempionlar Liqasının qrup üçüncüləridi.
