18 dekabr 2010 14:24
`Qarabağ` - `Muğan` matçının hakimindən görünməmiş səhv
Premyer Liqanın 18-ci turunun açılış oyunu olan `Qarabağ` - `Muğan` oyununu idarə edən Ceyhun Haşımov çox kobud bir səhvə yol verib. Azerisport.az xəbər verir ki, o, qarşılaşmanın birinci hissəsinin 43-cü dəqiqəsində komandaları fasiləyə göndərib.
Buna səbəb kimi, onun saatında yaranan problem göstərilir. Məhz bu üzdən dünya futbolunda bəlkə də heç vaxt rast gəlinməyən olay da yaşanıb. Belə ki, komandalar fasilədən qayıtdıqdan sonra yenə eyni qapılarda olmaq şərtilə, ilk yarıdan qalan həmin 2 dəqiqəni oynamaq məcburiyyətində qalıb. Həmin vaxt bitdikdən sonra isə qapıları dəyişən tərəflər ikinci hissəyə start verib.
Yəqin ki, Haşımovun bu kobud səhvi texniki səbəblərdən qaynaqlansa da belə, AFFA-nın Hakimlər Komitəsinin diqqətindən yayınmayacaq. Hər halda televiziya vasitəsilə bütün dünyaya yayımlanan qarşılaşmanı izləyən hər bir kəs bu biabırçılığın şahidi oldu və rüsvayçılığın cavabsız qalması inandırıcı görünmür.
