18 dekabr 2010 20:12
“Xəzər Lənkəran oyunu ilə sübut etdi ki, liderliyə layiq komandadır”
Bu gün Premyer Liqanın 18-ci turunun Bakıda keçirilən MOİK – `Xəzər Lənkəran` oyunundan sonra komandaların baş məşqçiləri qarşılaşmayla bağlı fikirlərini açıqlayıblar. Azerisport.az xəbər verir ki, `Xəzər Lənkəran`ın baş məşqçisi Mirça Rednik mətbuat konfransında 2:0 hesablı qələbələri haqda bunları söyləyib:
“Komandamız ilk hissədə daha yaxşı oynadı, lakin ikinci hissədə MOİK oyunu bərabərləşdirdi. Emeka Opara və Katalin Doman kimi futbolçulara bu oyunda oynamaq şansı verdik. Gələn tur `Qarabağ`la çətin oyunumuz var, artıq bu oyuna hazırlaşacağıq”.
MOİK-in çalışdırıcısı Ramil Əliyev isə bunları dilə gətirib: “Bu gün çempionatın liderinə qarşı oynadıq. `Xəzər Lənkəran` oyunu ilə sübut etdi ki, liderliyə layiq komandadır. Bizə demək olar ki, qol imkanı vermədilər. Hesab açılana qədər oyunu əks-hücumlar üzərində qurmaq istəyirdik. Növbəti tur səfərdə “Simurq”la qarşılaşacağıq. Artıq sabahdan bu oyunun hazırlıqlarına start verəcəyik”.
