18 dekabr 2010 11:19
UEFA Moskva `Spartak`ını cəzalandırdı
UEFA-nın Nizam-İntizam Komitəsi Slovakiyanın `Zilina` və Rusiyann `Spartak` (Moskva) klublarını cəzalandırıb. Azerisport.az xəbər verir ki, buna səbəb Çempionlar Liqasının qrup mərhələsi çərçivəsində bu komandaların görüşündə baş verən hadisələr olub. UEFA NİK-i işə baxdıqdan sonra hər iki klub haqda ölçü götürməyi lazım bilib.
Beləliklə, müzakirələr nəticəsində çıxarılan qərara əsasən `Spartak` ÇL-in növbəti ev oyununu boş tribuna önündə keçirəcək. Cəza şərti xarakter daşıyır və iki illik sınaq müddəti ilə şamil olunur. Moskva klubu həmçinin azarkeşlərinin ləyaqətsiz hərəkətlərində təqsirləndirilir. Çünki, dekabrın 8-i Slovakiyada keçirilən həmin qarşılaşmada Moskva klubunun azarkeşləri tribunadan pirotexniki vasitələri yandıraraq meydana atmaqla, oyunun təxminən 15-20 dəqiqə dayanmasına səbəb olmuşdular. Məhz azarkeşlərinin belə öznaşnalığına görə, `Spartak`a 75 min avro pul cəriməsi də kəsilib. Həmçinin `Spartak`ın oyunçusu İbson bu oyunda qırmızı vərəqə aldığı üçün iki avrokubok oyunu cəzalanıb.
Yaraşmaz hərəkətlərə görə “Zilina” da cərimələnib. Kluba xəbərdarlıqla yanaşı 5 min avro cərimə kəsilib. Çünki `Spartak`ın səfərdə 2:1 qalib gəldiyi oyunda hakim Slovakiya klubunun futbolçularına beş sarı vərəqə göstərib.
