“Altılığ”ın rəngi müəyyənləşir, `Bakı` yuxudan ayılmaq istəmir

Premyer Liqanın 18-ci turunun ilk oyun günü bir çox mətləblərə aydınlıq gətirdi. Azerisport.az xəbər verir ki, məhz dekabrın 18-nə təsadüf edən 4 qarşılaşmanın nəticələri bir sıra mətləbləri üzə çıxardı.

 

Hər şeydən öncə onu qeyd etmək yerinə düşər ki, məhz 18-ci tur artıq iki komandanın “ilk altılıq”da olacağını dəqiqləşdirmiş oldu. Bunlar hazırkı liderlər - `Xəzər Lənkəran` və `Neftçi`dir. Məhz bu iki əzəli rəqibin topladığı xallar artıq ilk 6 klub sırasına düşmək istəyən `Bakı` üçün keçilməzdi. Yəni artıq bu iki komanda hətta son 4 oyununu uduzsa belə, ilk altı komanda arasındakı mövqeyini qoruya biləcək. Qalan 4 vəsiqənin taleyinə isə elə qarşıdakı 4 turda aydınlıq gəlmiş olacaq.

 

Təbii ki, `Xəzər Lənkəran`la `Neftçi`nin vaxtından öncə belə sevinməsində bu gün öz taleyi də həll olunan `Bakı`nın paytaxt derbisində `İnter`ə yenilməsi rol oynadı. Axı son turda `Neftçi` üzərində qələbə qazanan “zolaqlılar”  çempiona da qalib gələcəyi halda, ilk altılıq uğrunda mübarizəni qızışdırmış olacaqdı. Lakin hətta hesabı açmasına rəğmən, Vinfrid Şeferin yetirmələri sonda qələbəni əldən vermiş oldular. Çempionla oyunun qəhrəmanı olmağa yaxın ikən, antiqəhrəmana çevrilən fransalı müdafiəçi Stefan Barbikoninin avtoqolu hər şeyin sonu oldu. Nəticədə 6 xallıq mübarizəni uduzmaqla, “altılığ”a gedən yolda daha bir ağır zərbə alan paytaxt təmsilçisinin bu çətin vəzifənin öhdəsindən gəlib-gəlməyəcəyini zaman göstərəcək. Hər halda yaydan bəri sanki yuxuda olan bu komandanın hələ də həmin şoklardan yaxa qurtara bilməməsi diqqət çəkir.

Günün daha bir maraqlı oyunu Gəncədə baş tutdu. Burada yerli `Gəncə`nin ötən tur `Bakı`ya məğlub olaraq, ilk pilləni `Xəzər Lənkəran`a təhvil verən `Neftçi` ilə qarşılaşmada nəhayət sürprizə imza atacağına ümid edənlər olsa da, yenə heç nə dəyişmədi. Cari mövsümdə Premyer Liqa və ölkə kubokunu nəzərə alınmaqla, artıq üçüncü dəfə qarşılaşan komandaların görüşündə yenə paytaxt təmsilçisi vacib qələbə qazandı. Premyer Liqanın 10-cu turunda bu rəqibini 6:2, ölkə kubokunun 1/8 finalında 3:1 hesabıyla məğlub edən Arif Əsədovun yetirmələri bu dəfə də 4 cavabsız qolla 3 sahib çıxdı. Lakin bu qələbə cəmi bir neçə saatlıq zirvəni geri qaytaran `Neftçi`nin mövqeyini qorumasına imkan vermədi.

 

Çünki günün digər oyununda MOİK-in qonağı olan `Xəzər Lənkəran` Elvin Beqirinin qollarıyla sürprizə imkan vermədi. Cari mövsüm digər oyunlarda da fərqlənən albaniyalı müdafiəçinin bu dublu cənubluların yenidən zirvədəki yerini geri qaytarmasıyla nəticələndi. Ən azı növbəti turun `Qarabağ`la oyununa kimi, bu ünvan toxunulmazdı.

 

Hesabat turu `Qarabağ` üçün də istənilən kimi alındı. Premyer Liqa çərçivəsində son ev oyununu Tofiq İsmayılov adına Suraxanı qəsəbə stadionunda keçirən Ağdam təmsilçisi bu görüşdə qələbə qazanmışdı. Həmin görüşdə ölkə çempionu `İnter`ə qalib gəlib, səfərdə də `Simurq`a eyni aqibəti yaşadan Qurban Qurbanovun komandası bu dəfə 3 xalı 2 qolla əldə etdi. Görünür, artıq ardıcıl xal itkilərindən lazımı dərs çıxarılıb. Axı “altılıq” mərhələsinin startına 4 tur qalmış gözlənilməz zərbə almamaq üçün bu, çox vacibdi.