18 dekabr 2010 12:03
Xalidu Sissoko: `İnter`lə oyunun favoriti bizik
`Bakı`nın qapıçısı Xalidu Sissoko azerisport.az saytına müsahibəsində Premyer Liqanın 18-ci turunun bu gün keçiriləcək `İnter`lə paytaxt derbisi öncəsi fikirlərini bölüşüb.
- Bu gün sizi çətin paytaxt derbisi gözləyir - `Neftçi` ilə oyundan sonra `İnter`lə görüşürsüz...
- `Neftçi`dən sonra `İnter` bizim üçün qorxulu deyil. Son turlarda bu komanda tez-tez xal itirir, ona görə biz sonadək döyüşməli olacağıq. Hesab edirəm ki, bu oyunun favoriti elə `Bakı`dı. Komandamız təmkinli oyun sərgiləyir. Əlbəttə, hərdən bizdə də alınmır. Ancaq `Neftçi` üzərində qələbə qara zolağa son qoymalıdı.
- Siz bu oyunu prinsipial hesab edirsiz?
- Əlbəttə, təkcə ona görə yox ki, eyni şəhəri təmsil edirik. Sadəcə hər iki komanda daima yüksək yerlər uğrunda mübarizə aparır. Azarkeşləri güzəştsiz mübarizə gözləyir. Kim birinci qol vurmağı bacarsa, çox böyük üstünlük əldə etmiş olacaq.
- `Bakı` daha çox hansı səbəbə `İnter` üzərində qələbə qazanmalıdı?
- Birincisi azarkeşlərimiz və prezidentimizə borcluyuq. Bir sıra oyunlarda biz çoxlu xallar itirdik və bu, əsəbləri bir qədər gərir. İndi borcumuzu qaytarmaq zamanıdı. İkincisi də bizə turnir cədvəlindəki vəziyyətimizi yaxşılaşdırmaq lazımdı.
- `Bakı`nın son oyunlarında artıq meydanda daha uğurlu oyun sərgiləməyin nə ilə bağlıdı?
- Komandada böyük rəqabət var. Hətta qapıçılar arasında da. Əgər mən meydana çıxıramsa, qələbə naminə əlimdən gələni edirəm. Çalışıram ki, hamıya kömək edim. Meydanda mənə daha çox özünəəminlik gəlir. Və çox şadam ki, nəhayət baş məşqçimizin etimadını qazana bildim.
- Oyunla bağlı proqnozunuzu açıqlaya bilərsiz?
- Mən 2:0 hesabıyla qələbə qazanmağımızı istəyirəm. Allah eləsin ki, belə də olsun. `İnter` çox güclü komandadı, açıq futboldan çəkinmir.
