19 dekabr 2010 11:48
Ramim: Hakim penalti təyin etməliydi
`Bakı`nın yarımmüdafiəçisi Fabio Luis Premyer Liqanın `İnter`lə oyunundakı məğlubiyyətdən (1:2) sonra azerisport.az-ın suallarını cavablayıb.
- `İnter`ə qarşı oyunu necə qiymətləndirirsiz?
- Oyun çox uğursuz alındı. Baxmayaraq ki, hesabı komandamız açmışdı. Lakin bəzi anlarda sanki dayanırdıq. Bilmirəm niyə? Yəqin ki, minimal hesablı qələbəni qoruyub saxlamaq istəyirdik. Sadəcə, `İnter` kimi komandayla oyunda belə taktikaya əl atmaq çox çətindi. Bütövlükdə isə hesab bizim səhvlərimizi göstərir. Bu oyunda qələbə qazanmağı çox istəyirdik. Ancaq nə baş verdiyini bilmirəm. Alınmır.
- Komandanın ilk altılığa düşmək baxımından şanslarını necə qiymətləndirirsiz?
- Aydın məsələdi ki, ümid sonda ölür. Hər şeyə rəğmən, biz sonadək vuruşacağıq ki, `altılığ`a düşək. Bəli, vəziyyətimiz heç də sadə deyil. Qarşıda heç də asan olmayan oyunlar var.
- Yeri gəlmişkən, `Bakı`nın həmin 4 rəqibindən ikisi - `Qəbələ` və AZAL turnir cədvəlində sizi qabaqlayırlar...
- Mən artıq açıqladım ki, bizi heç də asan olmayan 4 oyun gözləyir. Ən azı ona görə ki, biz bu qarşılaşmaların hamısından qələbəylə ayrılmağa borcluyuq. Bilirsiniz ki, Azərbaycanda 4 oyunu ardıcıl qələbəylə başa vurmaq elə də adi hal deyil. Özü də belə çətin vaxtımızda. Komanda qara zolaqdadı və hələlik bundan çıxa bilməmişik.
- Bu günkü oyunun hakimliyini necə dəyərləndirərdiz?
- Hakimlik bu gün yaxşı idi. Yalnız iki vəziyyətdə kobud səhvlərini çıxmaq şərti ilə. Qırmızı vərəqə anından Vadim Borets hakimi nəzərdə tutmurdu. Belə görünür ki, referi onun bizlə danışdığını başa düşmədiyi üçün meydandan qovdu. Sonuncu dəqiqədəki vəziyyətə gəlincə, hakim penalti təyin etməli idi. Çünki hücum anında rəqib oyunçu komanda yoldaşımızı cərimə meydançasının içində əliylə saxladı. Sadəcə, hakim bu anı gözdən qaçırdı.
