20 dekabr 2010 01:52
Berti Foqts: Üç oyun izləsəm də, yeni heç nə görmədim
Futbol üzrə milli komandamızın baş məşqçisi Berti Foqts Premyer Liqanın AZAL - `Qəbələ` görüşündən sonra azerisport.az və `Zerkalo`nun suallarını cavablayıb.
- AZAL ilə `Qəbələ`nin oyununu necə qiymətləndirərdiz?
- Maraqlı oyun alındı. Birinci hissədə `Qəbələ` çox gözəl oyun sərgiləyirdisə, fasilədən sonra da AZAL öz oyununu tapdı və gücünü göstərdi. Mən düşünürəm ki, 2:2 hesabı elə qarşılaşmanın ən ədalətli nəticəsi idi.
- 18-ci turda 3 oyunu canlı izlədiniz. Özünüz üçün yeni nəsə tapa bildinizmi?
- Heç nə. Mən bu oyunlara kimi bütün futbolçuları tanıyırdım. Odu ki, hələlik heç bir yenilik yoxdu.
- Ola bilərmi ki, yeni ili Azərbaycanda qeydə edəsiniz?
- Mən Bakıda çox oluram. Bura mənim işimdi. Yeni ilə gəlincə, onu evdə keçirəcəm.
- Dekabrın 21-də AFFA tərəfindən millinin ən yaxşı oyunçularının mükafatlandırılması mərasimi keçiriləcək. Bəlkə buna görə?
- Təəssüf ki, mən orda ola bilməyəcəm. Qayıtmalıyam. Katoliklərdə Milad günü olduğundan, buna görə getməliyəm. Sadəcə 18-ci turun oyunlarına baxmaq istəyirdim, bax buna görə qalmışdım.
- Siz Qurban Qurbanov və Vinfrid Şeferlə görüşəndən sonra bildirilirdi ki, Premyer Liqanın digər klublarının çalışdırıcılarıyla da görüşəcəksiz...
- Mən kimlərlə lazım idisə, onlarla görüşdüm.
- Yeri gəlmişkən, sizin `Bakı`dakı həmkarınızla görüşünüz qeyri-formal xarakter daşıyıb. Dəqiqdi ki, restoranda görüşmüsüz? Siz çoxdan dostluq edirsiz?
- Mən onunla birgə futbol oynamışam. Üç dəfə Almaniya çempionatını qazanmışıq. Biz yaxın dostuq.
- Hələ qarşıdakı Dubay toplanışının planlarını müəyyənləşdirməmisiz?
- Biz 2011-ci ilin sonuna kimi bütün planımızı müəyyənləşdirmişik. Dubayda isə biz iki yoldaşlıq oyunu keçirəcəyik. Həm də bu, artıq dəqiqdi.
- Təsadüfən həmin rəqiblərin kimliyi bəlli deyil?
- Bunu hələlik sizə deyə bilmərəm. Belə heç özüm də dəqiq bilmirəm. Nə vaxt dəqiqləşsə, sizə deyərəm.
