20 dekabr 2010 15:56
“Turan`a qalib gəlib, XL-nın `Qarabağ`la oyununun nəticəsini gözləyəcəyik”
`Neftçi`nin və milli komandamızın müdafiəçisi Rail Məlikov azerisport.az saytına müsahibəsində Premyer Liqanın 18-ci turu çərçivəsində `Gəncə`yə qarşı keçirilən oyundan danışıb, ilin ən yaxşı futbolçu və məşqçi namizədini açıqlayıb.
- Son turda `Neftçi` yenə `Gəncə`ni böyük hesabla məğlub etdi. Bu tendensiya nə ilə bağlıdı?
- `Gəncə` çox çətin rəqibdi. Xüsusilə onlarla evdə oynayanda rəqiblərə çətin olur. Biz onları son oyunlarda 6:2 və 3:1 hesabıyla məğlub etmişdik. Son oyun da çətin oldu. İlk 20 dəqiqədə `Gəncə`nin hesabı açmaq üçün nə qədər şansları oldu. Ancaq onlar öz qol vəziyyətlərindən dəyərlənə bilmədilər. Biz isə ələ düşən imkanlardan dəyərlənib 4 qol vurduq və görüşün taleyini həll etdik. Düşünürəm ki, `Neftçi` layiqli qələbə qazandı. Həmçinin `Gəncə`yə də yaxşı oyuna görə təşəkkür etməyə dəyər, sona qədər mübarizədə güzəştə getmədilər.
- `Bakı`yla oyundakı yenilgidən sonra özünüzə tez gələ bildiniz...
- `Bakı`ya qarşı oyunda çoxlu səhvlər etdik, `Gəncə` ilə oyunda isə tam fərqli futbol sərgilədik. Biz dərhal özümüzü ələ alıb, söz verdik ki, qış fasiləsi ərəfəsindəki son iki oyunda qələbə qazanaq. `Neftçi` əsl xalq komandasıdı və 1 məğlubiyyət bizi ruhdan sala bilməz.
- Növbəti turda `Turan`la oyununuz var. Həmin oyundan nə gözləyirsiz?
- `Gəncə`ylə oyunda əvvəlki zədəm özünü hiss etdirdi. Buna görə 64-cü dəqiqədə meydanı tərk etmək məcburiyyətində qaldım. Ancaq hər şeyi edirəm ki, `Turan`la oyunda iştirak edə bilim. Bizdə mənsiz də kifayət qədər zədəli var idi. İndi də mən zədələndim. Tovuzlularla da oyun çətin olacaq. Onlarla oyun daha çətindi, nəinki `Bakı` və `Gəncə`. Onlar `Neftçi`yə qarşı necə oynamaq lazım olduğunu yaxşı bilirlər. Tovuzdakı oyunda 2:2 hesabı qeydə alınmışdı. Ancaq bu dəfə həmin səhvlər təkrarlanmamalıdı. Qəbəbə qazanmaq və 2010-cu ili layiqli başa vurmaq istəyirik.
- `Neftçi` çempionatı lider kimi başa vura bilərmi? Bu, nə dərəcədə vacibdi?
- Əgər `Turan`a qalib gəlsək, `Xəzər Lənkəran`la `Qarabağ`ın necə oynamalı olduğunu gözləyəcəyik. Qurban Qurbanovun komandası həmişə liderlərə qarşı çox gözəl oyun sərgiləyir. Əgər onlar `Xəzər Lənkəran`ı dayandıra bilsə, onda biz birinci pillədəki mövqeyimizə qayıda bilərik.
- Başa çatmaqda olan ilin ən yaxşı futbolçusu kimi hesab edirsiz?
- Şübhəsiz ki, bu, Rəşad Sadıqovdu. O, bu ili əla keçirdi: həm `Qarabağ`da, həm də milli komandada. `Eskişehirspor`da zədə problemiylə üzləşməsəydi, yəqin ki, əsas heyətdə oynamaqda davam edəcəkdi.
- Bəs ən yaxşı məşqçi?
- Qurban Qurbanova rəqib yoxdu. `Qarabağ` da klublar arasında ən yaxşısıdı. Yığma isə ayrıca tarixdi. Onları eyniləşdirmək olmaz.
- Siz də digər idman növbləri ilə maraqlanırsızmı? Orda kimi qeyd edə bilərsiz?
- Digər idman növblərində qələbələr çox olub. Dərhal seçim etmək bir qədər çətindi. Şahmat, cüdo, güləşdə 2010-cu il üçün xeyli uğurlar qazanılıb. Yalnız ən yaxşı məşqçi Fərid Mansurov, ən yaxşı idmançı isə onun tələbəsi olan Həsən Əliyevi göstərə bilərəm.
