21 dekabr 2010 16:03
AFFA Tovuzdakı biabırçılığı cəzasız qoymadı
Bu gün AFFA İntizam Komitəsinin növbəti iclası keçirilib. Azerisport.az xəbər verir ki, aparılan müzakirələr nəticəsində Premyer Liqanın 18-ci turunun oyunlarıyla bağlı aşağıdakı qərarlar qəbul edilib:
Premyer Liqanın 18-ci turunun `Bakı` - `İnter` matçının 80-ci dəqiqəsində `Bakı`nın futbolçusu Vadim Borets idmançıya yaraşmayan hərəkətə görə ikinci sarı vərəqə alaraq meydandan kənarlaşdırıldığı üçün futbolçu 1 oyunluq cəzalanıb, klubu 200 manat cərimə olunub.
`Gəncə` - `Neftçi` matçında `Gəncə`nin 4 futbolçusu sarı vərəqə ilə cəzalandığı üçün klub 1000 manat cərimə olunub.
`Turan` - `Simurq` matçının 72-ci dəqiqəsində `Turan`ın azarkeşləri tərəfindən meydançaya kənar əşya atıldığı üçün klub 2000 manat cərimə olunub. Oyundan sonra başda Muammer Erdoğdu olmaqla `Turan`ın bir neçə oyunçusu qonaq komandanın soyunub-geyinmə otağına daxil olaraq `Simurq`un futbolçusu Elnur Abbasova xəsarət yetirmişdir. Bu hədisənin baş verməsinin əsas səbəbkarı Muammer Erdoğdunun digər futbolçuları da bu hadisəni törətməyə sövq etdiyini nəzərə alaraq adıçəkilən futbolçu 5 oyunluq cəzalanıb, klub 3000 (üç min) manat cərimə olunub.
AZAL - `Qəbələ` matçının 62-ci dəqiqəsində meydançaya kənar şəxs girdiyi üçün oyun dayandırılmışdır. Lakin futbolçuların köməkliyi ilə həmin şəxs meydandan çıxarılmışdır. Analoji hadisənin gələcəkdə baş verməməsi üçün meydançada ictimai təhlükəsliyi gücləndirməsi barədə AZAL klubuna xəbərdarlıq edilir.
Azərbaycan Kubokunun 1/8 finalının `Bakı` - `Muğan` matçında `Bakı`nın 4 futbolçusu sarı vərəqə ilə cəzalandığı üçün klub 1000 manat cərimə olunub.
