22 dekabr 2010 01:22
`Turan`dan AFFA-nın qərarına etiraz
19.12.2010-cu il tarixdə keçirilən Premyer Liqanın 18-ci turunun `Turan` - `Simurq` oyunundan sonra baş verən olaylar AFFA İntizam Komitəsi tərəfindən cavabsız qalmadı. Azerisport.az xəbər verir ki, Tovuz klubu, futbolçularının rəqib oyunçuları döyməsinə görə sərt cəzalara “layiq görüldü”.
Lakin deyəsən, bu cəzalar `Turan` rəhbərliyini razı salmayıb. Hər halda belə olmasaydı, onlar klubun rəsmi saytı vasitəsilə aşağıdakı etiraz bəyanatını yazmazdılar:
“Turan – Simurq oyunundan sonra baş verən olaylar bizim üçün də üzücüdür. Ancaq hesab edirik ki, İntizam Komitəsinin çıxardığı qərarlar həddindən artıq sərtdir.
Məlumat üçün bildirmək bildirmək istəyirik ki, oyundan sonra `Turan` klubunun futbolçusu Muammer Erdoğdu ilə `Simurq`un futbolçusu Elnur Abbasov arasında şəxsi münasibətlər zəminində yaranan mübahisə sonradan hay-küyə səbəb olmuşdur. Mübahisə qısa zamanda yekunlaşmış və futbolçular hərə öz soyunub-geyinmə otağına yollanmışdır. Həmin hadisə həddindən artıq şişirdilmişdir. `Simurq`un müdafiəçisi, münaqişədə tərəf kimi iştirak edən Elnur Abbasov da Muammer Erdoğdu ilə aralarında sadəcə mübahisənin baş verdiyini bildirdi. `Simurq`un kapitanı Samir Əliyev də mətbuata verdiyi açıqlamada bu məqamın şişirdildiyini və ciddi heç bir şeyin olmadığını deyib: “Fikrimcə, orada güclü dava olmayıb. Sadəcə, bu insidenti şişirtdilər”.
`Simurq`la `Turan` arasında keçirilən görüş zamanı heç bir insident baş vermədi, oyun dostluq və əsl futbol mübarizəsi ab-havasında başa çatdı. İstər futbolçuların, istərsə də azarkeşlərin `Simurq`a qarşı heç bir xoşagəlməz hərəkətləri olmamışdır. İndiyədək komandamızda belə xoşagəlməz hala rast gəlinməyib. Üstəlik 3 ildi `Turan`ın şərəfini qoruyan Muammer Erdoğdunu hamı intizamlıl futbolçu kimi tanıyır. 3 ildə onun adı heç bir qalmaqalda hallanmayıb. Bir dəfə də olsun qırmızı vərəqə ilə cəzalanmayıb.
Bundan əlavə qeyd etmək yerinə düşər ki, `Simurq`la `Turan` arasında bağlılıq Tovuz futbol məktəbinin bir neçə nümayəndəsinin, o cümlədən Elnur Abbasovun Zaqatala təmsilçisində çıxış etməsidi. Bütün bunları nəzərə alaraq, İntizam Komitəsinin Muammer Erdoğdu ilə bağlı ilə qərarına yenidən baxacağını və bu cəzanın yüngülləşəcəyinə inandığımızı bildiririk”.
