22 dekabr 2010 00:18
`Bakı` bazasında son məşqə çıxıb, Qəbələyə yollandı
Premyer Liqanın 19-cu turunda səfərdə `Qəbələ` ilə qarşılaşacaq `Bakı` 2010-cu ildə klub bazasında son məşqinə çıxıb. Azerisport.az xəbər verir ki, Vinfrid Şeferin yetirmələri bir saat ərzində fiziki təmrinlər və cərimə zərbələri üzərində çalışıblar.
Künc zərbələri, autdan birbaşa cərimə meydançasına ötürmələr üzərində çalışan futbolçular bununla da bu il üçün bazada sonuncu məşqini yekunlaşdırıblar. Zədəsi tam sağalmayan qapıçı Marko Şarliya, Hacı Əhmədov və Rəhman Hacıyev məşqdə iştirak etməyiblər.
`Bakı` bu gün səhər saat 9:00-da Qəbələyə yola düşəcək. Oyunöncəsi son məşq isə saat 15:00-da Qəbələ şəhər stadionunda baş tutacaq. Adıçəkilən qarşılaşmanın startı isə dekabrın 23-də, saat 13:00-da veriləcək.
