22 dekabr 2010 12:50
Sadıq Sadıqov: `Neftçi`ni Avropada zəfərlərə daşıyacağıq
İstanbul Ceylan Beynəlxalq Mərkəzində Türkiyənin ən böyük informasiya agentliklərindən olan "Spor Ajans"ın "İlin idman adamları" beynəlxalq mükafatlandırma mərasimində "Avropada ilin klub prezidenti" mükafatına layiq görülən `Neftçi`nin prezidenti Sadıq Sadıqov bu münasibətlə fikirlərini bölüşüb. Azerisport.az xəbər verir ki, paytaxt klubunun prezidenti bunları söyləyib:
“Qardaş ölkələr - Türkiyə və Azərbaycan haqqında ulu öndərimiz Heydər Əliyevin gözəl kəlamı vardır: "Biz iki millət, bir dövlətik!". Bu böyük kəlam ölkələrimizin din, dil, irq bərabərliklərini göstərir. Hal-hazırda möhtərəm prezidentimiz cənab İlham Əliyevin və Türkiyə prezidenti Abdulla Gülün dəstəyi ilə bu qardaşlıq bütün sahələrdə özünü büruzə verir. Bu dostluğu, qardaşlığı idmana daşımaq üçün də İstanbulda olduq.
Azərbaycanın 1937-ci ildə qurulan ən köklü və ən populyar komandası olan `Neftçi` futbol klubu Sovetlər Birliyi dönəmində də gücünü isbat edib və müstəqil Azərbaycanda da ən çox çempionluğu qazanıb.
Hörmətli prezidentimiz İlham Əliyevin idmanın inkişafına verdiyi dəstəklə Azərbaycan bütün dünyada idman ölkəsi kimi tanınmaqdadır. Rəhbərlik etdiyim `Neftçi` İdman-Sağlamlıq Mərkəzi digər idman növlərində də olimpiya, dünya və Avropa çempionları yetişdirmiş və Azərbaycana bu yarışlarda ən çox medal qazandıran klub olmuşdur.
Azərbaycan futbolunda da son vaxtlar görülən işlər beynəlxalq futbol təşkilatları tərəfindən yüksək qiymətləndirilmişdir. Türkiyənin məşhur Spor Ajans informasiya agentliyinin bizə verdiyi bu böyük mükafatdan ruhlanaraq, `Neftçi`ni də Avropada gələcək zəfərlərə daşıyacağıq”.
