23 dekabr 2010 13:34
`Eskişehirspor` azarkeşlərindən Rəşada təbrik, kluba etiraz
Milli komandamızın kapitanı Rəşad Sadıqovun AFFA tərəfindən ilin ən yaxşı futbolçusu adına layiq görülməsi Türkiyədə də diqqətdən kənarda qalmayıb. Azerisport.az xəbər verir ki, bəzi mətbuat orqanlarının bu haqda xəbərini eşidən `Eskişehirspor` azarkeşləri dərhal klubun rəsmi saytına hücum çəkərək, onu təbrik etməyə çalışıblar.
Lakin bu təbriklər futbolçumuz üçün ayrılan xüsusi forum səhifəsində yer alıb. Klubun rəsmi saytının xəbərləri arasında isə həmyerlimizin bu uğuruna biganə münasibət göstərilib. Rəhbərliyin bu münasibəti azarkeşlərin də narazılığına səbəb olub. Onlar da bu məqama diqqət çəkərək, ən azı həmin narazılıqlarından sonra klubun da futbolçumuza rəsmi təbrik ünvanlayacağına ümid etdiklərini bildiriblər. Onlar millimizin üzvünün oyununu tərifləyərək, Rəşadın ehtiyatda qalmasına da etirazlarını dilə gətiriblər.
