23 dekabr 2010 14:16
Kamran Ağayevlə Rəşad Sadiqovun məşqçisindən minnətdarlıq
`Neftçi`nin 15 yaşlı yeniyetmələrdən ibarət komandasının baş məşqçisi İslam Kərimova “Azərbaycan Respublikasının əməkdar məşqçisi” fəxri adı verilib. Azerisport.az xəbər verir ki, tanınmış uşaq məşqçisi, Gənclər və İdman naziri Azad Rəhimovun ona təqdim etdiyi bu fəxri ad münasibətilə paytaxt klubunun rəsmi saytına açıqlama verib:
“Mənə göstərilən diqqətə görə “Neftçi” PFK-nın və Gənclər və İdman Nazirliyinin rəhbərliyinə dərin minnətdarlığımı bildirirəm. Azərbaycan futbolunun gələcəyi uşaqlardır. “Neftçi”də uşaq futboluna böyük önəm verilir. Təsadüfi deyil ki, flaqmanın uşaq və yeniyetmə komandaları hər il mükafatçılar sırasında olurlar. Elə mənim rəhbərlik etdiyim 15 yaşlılardan ibarət komanda bu mövsüm artıq sona 5 tur qalmış final mərhələsinə vəsiqə qazanıb. Çalışacağam ki, bundan sonra da mənə göstərilən etimadı doğruldum” – deyə İslam Kərimov bildirib.
Qeyd edək ki, İslam Kərimov məşqçi kimi 1992-1999-cu illər və 2004-cü ildən indiyədək `Neftçi`də çalışıb. O, 1999-2004-cü illərdə rəhbərlik etdiyi Azərbaycanın U-17 yığma komandasını 2002-ci ildə tarixində ilk dəfə ikinci mərhələyə yüksəldib. Kərimov `Neftçi` ilə 5 beynəlxalq turnirin (Danimarka, İtaliya, İspaniya, Bolqarıstan, Gürcüstan) qalibi olub. İslam Kərimovun rəhbərlik etdiyi `Neftçi`nin yeniyetmələrdən ibarət komandaları 9 dəfə Azərbaycan çempionu olub, 2 dəfə ikinci, 1 dəfə üçüncü yeri tutub.
İslam Kərimov Azərbaycan futboluna bir sıra səviyyəli futbolçular yetişdirib. Onlardan 38-i hazırda Premyer Liqada çıxış edir, 20-si Azərbaycanın müxtəlif yığma komandalarının heyətinə cəlb olunub. Kərimov Azərbaycana Ruslan Abışov, Kamran Ağayev, Araz Abdullayev, Amit Quluzadə, Ruslan Əmircanov, Vüqar Nadirov, Rəşad Sadiqov və s. futbolçular bəxş edib.
