23 dekabr 2010 18:57
“Qapımızdan keçirilən qol futbolçularımıza psixoloji cəhətdən pis təsir etdi”
Premyer Liqanın 19-cu turunda Zaqatalada keçirilən - `Simurq` - MOİK görüşündən sonra hər iki komandanın baş məşqçisi oyunla bağlı fikirlərini açıqlayıb. Azerisport.az xəbər verir ki, səfərdə sərfəli heç-heçəyə imza atan MOİK-in baş məşqçisi Ramil Əliyev bunları dilə gətirib:
“Çox maraqlı qarşılaşma oldu, çoxlu qol epizodları izlədik. Müəyyən epizodlarda `Simurq` komandasında üstünlük var idi. Məncə oyunun heç-heçə bitməsi ədalətli nəticədi. Əsas məqsədimiz Premyer Liqada qalmaqdı. Çalışacağıq ki, buna nail olaq”.
“Simurq”un baş məşqçisi Qyoko Haciyevski isə qələbəni əldən vermələrini belə dəyərləndirib: “Bir çox qol imkanlarımız oldu, bunlardan istifadə edə bilmədik. MOİK-in qapımızdan keçirdiyi qol futbolçularımıza psixoloji cəhətdən pis təsir etdi. İstədiyimiz nəticəni əldə edə bilməsək də, futbolçularımdan razı qaldım. Oyundan sonra MOİK-in qapımızdan keçirdiyi qolun videoyazısına baxdım, oyundan kənar vəziyyət yox idi. Hakimin qərarı düzgün idi”.
