23 dekabr 2010 11:38
Mahmud Qurbanov: Bizdə böyük potensial var, komanda oyunu yoxdu
`Bakı`nın yarımmüdafiəçisi Mahmud Qurbanov bu gün Premyer Liqanın 19-cu turu çərçivəsində keçiriləcək `Qəbələ` ilə oyun öncəsi azerisport.az-ın suallarını cavablayıb.
- Bu gün `Bakı` `Qəbələ`ylə üz-üzə gələcək. Yəqin ki, bu matçın komandanız üçün nə qədər vacib əhəmiyyət daşıdığını deməyə ehtiyac yoxdu?
- `Qəbələ`ylə oyun bizim üçün həyati önəm daşıyır. Bu, bizim tariximizdəki ən əhəmiyyətli oyundu. Biz nəyə qadir olduğumuzu göstərməliyik. Bu komanda çox güclü dəyişikliklərə məruz qalıb. İndi `Qəbələ`də çox güclü əcnəbilər çıxış edir, ancaq biz onlardan müdafiə olunmağı, meydanda hər şeyi sübut edə bilərik. Bu, bizim üçün son oyundu – ya “altılığ”a düşəcəyik, ya da ondan kənarda qalacağıq.
- `Bakı`nın hazırkı vəziyyətinin səbəbini nədə görürsünüz?
- Bilmirəm nə problemdi. `İnter`lə son oyunda biz öz səhvlərimizdən uduzduq. Bizdə böyük potensial var, amma komanda oyunu yoxdu. Ayrı-ayrılıqda hər bir futbolçu çox güclüdü. Ancaq nəyəsə görə bu komandada heç nə alınmır. Çox qeyri-sabit oyun sərgiləyirik. `Neftçi` üzərindəki qələbədən sonra eyforiyaya qapıldıq.
- Bəs bütün bunlara görə kim günahkardı?
- Günahkar bütün futbolçulardı. Əgər oyun alınmırsa, buna ilk növbədə komanda günahkardı. Meydanda bütün gücümüzü qoysaq da, nəticə yoxdu. Əgər `Bakı` autsayderlərlə oyunlarda da xal itirirsə, bu o deməkdi ki, biz necə oynamaq lazım olduğunu bilmirik. İndi başlıca məsələ hər şeyi diqqətlə yoxlayıb, problemləri yoluna qoymaqdı. Bunun üçün də `Qəbələ`yə qalib gəlməli və 2011-ci ildəki oyunlara hazırlaşmaq lazımdı.
- Əgər `Bakı` ilk altılığa düşə bilməsə, necə olacaq?
- Bu haqda düşünmək belə istəmirəm. Əgər ilk altı komanda arasına düşə bilməsək, bu, əsl faciə olacaq. Mövsümün əvvəlini xatırlayıb, qarşımıza çempionluq hədəfi qoymağımızı yadıma salanda, indiki durumumuz sadəcə gülməli gəlir. İndisə “altılığ”a düşmək üçün vuruşuruq. Bizdə nə baş verir, baş açmıram. Sadəcə şokdayıq.
- Əgər `Bakı` sadəcə yaşamaq üçün mübarizə aparırsa, o zaman bu qədər legioner nəyə lazımdı?
- Bu sual mənə verilməməlidi. Hər şeyi rəhbərlik həll edir. Mən sadəcə futbolçuyam, çıxıb meydanda maksimum gücümlə mübarizə aparmalıyam. Rəhbərlik bizim üçün hər şəraiti yaradıb. Bizim üçün bunun qarşılığında belə nəticələr göstərməyimiz utandırıcıdı.
