25 dekabr 2010 13:38
Azərbaycan AÇ-2012-nin təşkilatçıları sırasında
Azərbaycan Donetsk şəhərinin 2012-ci ildə futbol üzrə Avropa çempionatına hazırlıqlarına köməklik göstərəcək. Azerisport.az xəbər verir ki, bu barədə Dünya Azərbaycanlıları Konqresi (DAK) nümayəndələrinin Donetsk vilayəti dövlət administrasiyası (DVDA) sədrinin birinci müavini Sergey Derqunov və Azərbaycanın Ukraynadakı səfiri Eynulla Mədətli arasında görüşdə qərar qəbul olunub.
Görüşdə DAK üzvləri yeni təşəbbüslə çıxış edib: “Böyük planlarımız var. AÇ-2012-nin hazırlıqlarına biz də öz töhfəmizi vermək istəyirik. Donetskdə bizim üçün park ayrılarsa, onu Azərbaycan mədəniyyət mərkəzi kimi qurarıq”.
Xatırladaq ki, futbol üzrə 2012-ci ildə təşkil ediləcək Avropa çempionatı Ukrayna və Polşada keçiriləcək. AÇ-2012-nin oyunlarının keçiriləcəyi şəhərlər arasında Qdansk, Poznan, Varşava, Vratslav, Lvov, Xarkov, Kiyev və Donetsk də var.
