26 dekabr 2010 12:48
Yoahim Löv: Azərbaycanla oyunda qeydə alınan nəticə hər kəs üçün sürpriz oldu
AÇ-2012-nin seçmə mərhələsi çərçivəsində millimizlə eyni qrupda yer alan Almaniya yığmasının baş məşqçisi Türkiyənin məşhur `Fanatik` nəşrinə müsahibə verib. Azerisport.az xəbər verir ki, Türkiyə və Almaniya futbolunun bu günü, iki ölkə yığmasının seçmə mərhələdəki çıxışı, eləcə də Avropadakı türk futbolçuların milliləşdirilməsi məsələsinə toxunan Bundestimin çalışdırıcısı Azərbaycan millisinin “ay-ulduzlular” üzərində sensasion qələbəsindən də danışıb.
Onun bəzi diqqətçəkən açıqlamalarıyla sizi də tanış edirik: “Qrup mərhələsində Türkiyə ilə oynadığımız matçda Qus Hiddinkin meydana çıxardığı heyəti görəndə çox təəccübləndim. Heyətdəki 4-5 ad mənim üçün həqiqətən çox sürpriz idi. Bəlkə də ona görə idi ki, qarşılaşma da gözlədiyimdən asan keçdi. Daha ciddi start heyəti gözləyirdim. Düşünürəm ki, Hiddinkin bəzi matçlarda belə dəyişiklikləri onun öz strategiyasından irəli gəlir. Çünkü bunları birdən-birə etmək mümkün deyil, istər-istəməz səhvlər olacaq. Təbii ki, bizdən sonra Azərbaycanla səfər oyununda qeydə alınan nəticə hər kəs üçün böyük sürpriz oldu. Ancaq Türkiyənin AÇ-2012-nin final mərhələsinə qatılmaq şansının hələ də qaldığını düşünürəm. Avstriya ilə İstanbulda ciddi sınağa çıxacaqsız. Mən Türkiyəyə inanıram”.
