27 dekabr 2010 16:54
“Məqsədimiz `Qarabağ`la çempion olmaq və Avropada legioner həyatı yaşamaqdı”
Bu gün `Qarabağ`la müqaviləsinin müddətini artıran futbolçular klubun rəsmi saytına açıqlama veriblər. Azerisport.az həmin açıqlamalarla sizi də tanış edir:
Maksim Medvedev: `Qarabağ` mənim ilk peşəkar klubumdu. 21 yaşım olsa da, artıq 4 ildən çoxdu ki, `Qarabağ`ın əsas heyətində top qovuram. Burada artıq özümü `bərkitmişəm`. Təbii ki, doğma klubumla müqaviləmi uzatdığıma görə sevinirəm. Həm Rauf, həm də Əfranla uşaqlıqdan birlikdəyik. Hamımızın müqaviləsinin uzadılması çox sevindiricidir. Bu, bizə daha yaxşı çıxış etmək üçün motivasiya verir. Ümid edirəm ki, tezliklə, qazanacağımız uğurlarla azarkeşləri sevindirəcəyik”.
Rauf Əliyev: “Təbii ki, Maksim kimi mən də gənc olmağımıza baxmayaraq artıq köhnələrdən sayılırıq. `Qarabağ` daim mənə sahib çıxıb. İndi rahatca futbol haqqında fikirləşəcəyik. Öz “evimizdə” daha 2 il qalacağıq. Əsas məqsədimiz `Qarabağ`la çempion olmaq sonra isə, Avropada legioner həyatı yaşamaqdır”.
Əfran İsmayılov: “Qarabağ` mənim üçün özəl komandadır. Özümü burda çox rahat hiss edirəm. 5 aydı futbol oynamasam da, mənə qarşı çox diqqətli davranırlar. `Qarabağ`la yeni müqavilə bağladığıma görə çox xoşbəxtəm. Bilirəm ki, azarkeşlər məndən çox şey gözləyir. Biz gənclərin birlikdə oynaması eyni zamanda Azərbaycan millisinin gələcəyi üçün də faydalıdır”.
Ansi Aqolli: “6 ay bundan qabaq `Qarabağ`a gələndə belə əla komandaya düşəcəyimi gözləmirdim. Teli mənə `Qarabağ`ı çox tərifləsə də, öz gözlərimlə Admirin dediklərinin həqiqət olduğunun şahidi oldum. `Qarabağ`da bir ailə mühiti var. İnşallah, `Qarabağ`da daha böyük uğurlara imza atarıq. Bunun üçün `Qarabağ`da istəniləm mühit var”.
Qara Qarayev: “Əslən Qarabağlı olduğuma görə `Qarabağ` mənim komandam olmaqla yanaşı aldığım nəfəsdi. Özümü `Qarabağ`dan başqa heç bir yerdə təsəvvür edə bilmirəm. Hələ 5 il `Qarabağ`ın futbolçusu olacağıma görə həqiqətən sevinirəm”.
