27 dekabr 2010 11:54
Vəli Qasımov: Yığmada Avropa standartlarına cavab verən oyunçular yoxdu
Futbol üzrə Azərbaycanın əsas yığmasının köməkçi-məşqçisi, 19 yaşlılardan ibarət millimizin çalışdırıcısı Vəli Qasımov azerisport.az və “Zerkalo”nun suallarını cavablayıb.
- Geridə qoyduğumuz il sizin üçün futbol planında necə alındı?
- Başlanğıc əlbəttə, elə də uğurlu alınmadı. Ancaq sonradan bir çox uğurlar oldu. Mənə Azərbaycan millisinin məşqçilər korpusuna dəvət gəldi. Ardından isə U-19-a baş məşqçi təyin olundum. İndi mənə işləmək və özümü sübut etmək qalır.
- Berti Foqtsla işləmək necədi?
- Əla. Hələlik aramızda heç bir problem yoxdu. Millinin yaxşı nəticələrinin xətrinə əl-ələ verib işləyirik.
- Alman çox tələbkardı?
- Əlbəttə. Bu, artıq bir qədər daxili işimizdi. O, əsl Avropa səviyyəli məşqçidi və mən də o istiqamətdə işləməyə öyrəşirəm. Ona görə də xüsusi çətinlik hiss etmirəm. Fikrimcə, hələ mən tərəfdən xüsusi məzəmməti yoxdu.
- Foqts Bakıda olmayanda çox işləməli olursuz?
- Məcburi qaydada işlər yetərincədi. O, hər səfər öncəsi mənə müəyyən olunmuş tapşırıqlar verir. Milli üzvlərini yaxından izləmək, həmçinin ehtiyat qüvvəylə maraqlanmaq.
- İkinci işinizi – U19-da işləməyi çatdıra bilirsiz?
- Təəssüflənmirəm. Bu komandayla öz sistemim üzrə çalışıram, hansı ki, bütün karyeram boyu, görüb öyrənmişəm. Çalışıram elə edim ki, bu komanda rəhbərliyim altında yalnız yaxşı nəticələri yox, həm də sərgilədiyi gözəl futbolla seçilsin.
- Yəqin Foqts bu baxımdan da sizə hansısa tapşırıqlar verir...
- Hələ o, mənə heç bir tapşırıq verməyib. Mən komandayla yenicə tanış olmuşam. Lazımı nə varsa, hər şey ediləcək. Hansı ki, mən yeni dəvət olunan uşaqlarla işləməliyəm. Hələ yenilərinə də baxmalıyam. Ən güclüləri və xeyirli olanları komandada saxlamaq istəyirəm.
- Sizin komandanız da əsas millimizin sistemiylə oynayacaq? Axı xarici ölkələrdə adətən belə vahid sistemdən yararlanırlar....
- Bu sistemlə oynamaq çətin olacaq. Hazırkı komandada Avropa standartlarına cavab verən oyunçular yoxdu. Elə etmək lazımdı ki, yaxın zamanlarda elə futbolçularımız olsun.
- Premyer Liqada “altılıq”lar müəyyənləşmək üzrədi. Siz nə gözləyirsiz?
- Premyer Liqada bu mövsüm oyunlar son dərəcədə maraqlı keçir. Favorit komandalarla layiqli mübarizə aparan kollektivlərin də olması bu mövsümü çox maraqlı edir.
- Siz AZAL ilə `Qəbələ`ni nəzərdə tutursuz?
- Ad çəkmək istəmirəm. Bəzi komandalar da var ki, qeyri-sabit çıxışlarıyla seçilirlər. Bir oyun yaxşı oynayırlar, növbəti oyunda yenə bərbad oyunla hamını təəccübləndirirlər. Halbuki, heyətinə görə, heç bir komandadan zəif deyil.
- Sizcə, əsas mübarizə kimlər arasında gedəcək?
- Komandalar belə qeyri-sabit olduğundan, bu barədə dəqiq söz demək çətindi.
- 2011-ci ildən nə gözləyirsiz?
- Nəticələrimizin yaxşılaşmasını. Və ən əsası seçmə mərhələdə daha çox qələbə.
- Əsas uğurları klublardan gözləyirsiz yoxsa yığmadan?
- Hər şey klublardan başlayır. Nə qədər güclü klublarımız olsa, yığmamız da bir o qədər güclü olacaq. Odu ki, ilk növbədə klublarımızdan avrokuboklarda uğur gözləyirəm.
