28 dekabr 2010 13:06
İlin son cəzaları `Bakı` və `Xəzər Lənkəran` üçün daha ağır oldu
Bu gün AFFA İntizam Komitəsinin 2010-cu ildə son iclası keçirilib. Azerisport.az xəbər verir ki, tədbirdə aparılan müzakirələrdən sonra Premyer Liqanın qış fasiləsi ərəfəsindəki sonuncu – 19-cu turunun oyunlarında baş verən olaylarla bağlı aşağıdakı qərarlar qəbul edilmişdir:
Premyer Liqanın 19-cu turunun `Qəbələ` – `Bakı` matçında hər iki klubun 4 futbolçusu sarı vərəqə ilə cəzalandığı üçün 1000 manat cərimə olunublar. Oyunun 71-ci dəqiqəsində `Bakı` klubunun məşqçisi Aleksandr Polkin texniki zona qaydalarını pozduğuna görə meydandan kənarlaşdırıldığı üçün 1 oyunluq cəzalanıb, klubu 1000 manat cərimə olunub.
`Muğan` – AZAL matçında `Muğan`ın 4 futbolçusu sarı vərəqə ilə cəzalandığı üçün klub 1000 manat cərimə olunub. Oyunun 90+4-cü dəqiqəsində `Muğan`ın futbolçusu Cavad Mirzəyev kobud oyuna görə ikinci sarı vərəqə alaraq meydandan kənarlaşdırldığı üçün 1 oyunluq cəzalanıb, klubu 200 manat cərimə olunub.
`Xəzər Lənkəran` – `Qarabağ` matçında `Qarabağ`ın 4 futbolçusu sarı vərəqə ilə cəzalandığı üçün klub 1000 manat cərimə olunub. Matçın 13-cü və 72-ci dəqiqələrində `Xəzər Lənkəran` klubunun azarkeşləri tərəfindən meydançaya kənar əşya atıldığı üçün klub 2000 manat cərimə olunub.
