29 dekabr 2010 12:46
Maksim Medvedev: Gizlətmirəm ki, bundan sonra daha çox qazanacam
`Qarabağ`ın və Azərbaycan millisinin müdafiəçisi Maksim Medvedev azerisport.az və “Zerkalo”ya müsahibə verib.
- `Qarabağ`la müqavilənin müddətini 2013-cü ilə qədər artırmağına nə səbəb oldu?
- Mən sonuncu dəfə `Qarabağ`la müqavilə bağlayanda hələ əvəzedici komandada idim. İndi isə müqaviləyə yenidən baxmağa qərar verdik.
- Yəqin ki, maliyyə baxımından da yeniliklər var.
- Qiymətə də yenidən baxıldı. Gizlətmirəm ki, bundan sonra daha çox qazanmış olacam.
- Karyeranla bağlı başqa variantlar yox idi?
- Real olanı yox idi. Ancaq bəzi maraqlananlar olmuşdu. Bu təkliflər həm xarici ölkə klublarından, həm də öz klublarımızdan idi. Amma mən hamıya cavab verirdim ki, öz klubumla müqaviləm var. Axı heç bir problem olmadığı halda, öz klubumu niyə tərk etməliydim ki?
- Siz müqabilənizin sonuna kimi qalmaq fikrindəsiz?
- Necə alınsa. Əgər yaxşı təklif gəlsə, təbii ki, buna baxmaq olar. Əminəm ki, klub rəhbərliyi elə bir təklif olsa, məni göndərməyə razılaşar.
- `Xəzər Lənkəran` üzərindəki qələbədən sonra işlərinizin qaydasına düşdüyünü demək olar?
- Bu qələbə bizim üçün də əsl sürpriz oldu. Biz çox vacib 3 xal qazandıq ki, bizə böyük köməyi dəydi. Təbii ki, qələbə özümüzə daha əmin olmağımıza şərait yaradır. Ancaq bundan rahatlanmaq da olmaz. Unutmamalıyıq ki, yeni ildəki ilk oyunumuz `Qəbələ`yə qarşı olacaq. Zaman bəzi şeyləri dəyişir. Ancaq ümid edirəm ki, hazırkı heyətimiz, oyunumuz elə də ciddi dəyişikliklərə məruz qalmayacaq.
- İli özünüz üçün nə dərəcədə uğurlu hesab edirsiz?
- Əgər ölkə kubokundan kənarlaşmağımızı nəzərə almasaq, heç də pis hesab etmirəm. Lakin `Turan`a penaltilər seriyasında yenilməyimiz çox gözlənilməz oldu. Avropa Liqasında uğurlu çıxış, Türkiyə üzərində qələbə. Bütün bunlar çox şeydən xəbər verir.
