30 dekabr 2010 13:38
Vaqif Qasımov: Xal itkisinə görə oyunçuları asmalıyam?!
AZAL-ın prezidenti Vaqif Qasımov azerisport.az və “Zerkalo”ya müsahibəsində komandasının son nəticələri və ilk altılığa düşmək şanları haqda danışıb.
- Son vaxtlar AZAL-ın nəticələri bir qayda olaraq pisləşib. Nə baş verir?
- Siz bizim hansı komandalarla oynadığımıza baxın. Belə rəqiblərlə müvəffəqiyyətsizlik qaçılmazdı. Hətta `İnter` və `Neftçi` ilə heç-heçələr pis nəticə deyil. Əgər başqa komandalar belə nəticələr göstərsəydi, şad olardılar.
- Necə hesab edirsiniz, liderlər qrupunda olan komandanın dörd oyunda üç xal toplamağa haqqı var?
- Əlbəttə, yox. Ancaq kim gözləyirdi ki, biz `Muğan`la oyunda üç xal itirəcəyik? Çətin ki, `Xəzər Lənkəran` öz meydanında `Qarabağ`a məğlub olacağını düşünərdi. Hətta `İnter`i 5:0 məğlub etdiyimiz oyunda rəqib iki imkanı dəyərləndirə bilsəydi, biz məğlub ola bilərdik.
- Adətən klub rəhbərliyi bir aydan artıq qələbə qazana bilməyən komandanı belə şiddətlə müdafiə etmir...
- Mən komandamı müdafiə etmirəm. Axı siz klubda onlarla necə danışdığımı bilmirsiniz. Bunu sizə deyə bilmərəm. Digər tərəfdən xal itkisinə görə onları asmayacağam ki...
- Komandanız son qələbəni noyabrda `Turan`la oyunda qazanıb. Ola bilər ki, AZAL sadəcə rahatlaşıb?
- Belə ola bilməz. O səbəbdən ki, onlar hələ xüsusi heç nəyə nail olmayıblar. Mən sadəcə diqqəti bir məqama yönəltmək istərdim ki, bəzi klublar kobudluqdan şikayətlənir. Ancaq heç kim demir ki, bizim oyunçulara qarşı necə oynayırlar. Gör neçə oyunçumuz zədə alıb. Yeri gəlmişkən, bizi bilərəkdən əzirlər.
- Ümumiyyətlə, hər dəfə komandanızın antifutbolda ittiham olunması sizi usandırmayıb?
- Bunu kim deyir? Ümumiyyətlə, başa düşmürəm niyə belə deyirlər. Özləri antifutbol oynayır. 19 oyunda 26 dəfə rəqib qapılarına yol tapa bilmişik. Bu, Premyer Liqa komandaları arasında ən yaxşı nəticələrdən biridir. Əvvəlcə buna baxsınlar, sonra danışsınlar.
- Necə hesab edirsiniz, komandanız ilk altılıqda yerini qoruya biləcək?
- Hələ ki, ancaq `Neftçi` və `Xəzər Lənkəran` həlledici mərhələdə yerlərini təmin ediblər. Son dörd vəsiqə uğrunda beş komanda mübarizə aparacaq. Uğursuzun kim olacağını demək çətindir. Ümid edirəm ki, bu uğursuzluqdan yan keçə biləcəyik.
- Yeri gəlmişkən, məşqçilər heyəti iki futbolçu ilə vidalaşıb. Onların yerinə kim gələcək?
- İki və ya üç futbolçu gələcək. Hələ kimlərlə güclənəcəyimizi müəyyən etməmişik.
- Əgər dəyişiklik bu qədər azdırsa, demək komandadan razısınız?
- Sözsüz. Qarşıda hələ üç tur və bizim 34 xalımız var. Çatışmazlıqlar var. Bir-iki oyunu istisna etsək, qalan oyunlarda çox uğurlu çıxış etmişik.
