1 yanvar 2011 14:42
“Bu Yeni ili hələ çox xatırlayacam”
Azərbaycan yığmasının və `Bakı`nın yarımmüdafiəçisi Fabio Luis Ramimin azerisport.az saytına müsahibəsi.
- Niyə siz digər legionerlərin hamısından fərqli ölkəmizdə qalmağa, Yeni ili Bakıda keçirməyə qərar verdiniz?
- Bakı mənim üçün qətiyyən özgə şəhər sayılmır. Məni burda sevirlər və hörmət edirlər. Bu birincisi. İkincisi Braziliyaya uçmaq xeyli vaxt alır. Ora gedib-gəlmək üçün 40 saat vaxt ayırmalısan hər dəfə. Mənim üçünsə hər günüm qiymətlidi. Həm də `Bakı` artıq yanvarın ilk günlərindən təlim-məşq toplanışına yığışacaq.
- Bəs doğmaların?
- Bu problem yoluna qoyulub. Anam, həyat yoldaşım və qızım yanıma gəliblər. Düşünürəm ki, yeni ildən sonra onlar heç Azərbaycanı tərk etmək belə istəməyəcəklər. Prinsipcə, sevdiklərin yanındadırsa, sənin harda olmağının o qədər də önəmi yoxdu.
- Bakıdakı Yeni il sənin üçün nə ilə yadda qalmış olacaq?
- Mən artıq iki ildi ki, normal istirahət edə bilmirəm. Futbol və yollar. Yayda avrokuboklar, qışda təlim-məşq toplanışları. Ancaq buna görə istirahət edə bilmirəm. Mən çox yorulmuşam. Şəhərə çıxıb əylənməyi planlaşdırıram. Bu Yeni ili hələ çox xatırlayacam.
- Hara çıxmağı planlaşdırırsan?
- Doğmalarıma şəhərin mərkəzini göstərmək istəyirəm. Oralar çox gözəl və insanlarla gur olur. Tarixi məkanları göstərəcəm. Restorana və mağazalara gedəcəyik.
- Sizin artıq Bakıda sevdiyiniz məkan var?
- Bir neçə yer var. Amma Bakının hər yeri yaxşıdı. Bu, hazırda Avropanın ən yaxşı şəhərlərindən biridi.
- 2010 sizin üçün necə yaddaqalan oldu?
- Bir çox şeylərlə. Qələbələrlə də, məğlubiyyətlərlə də. İl demək olar ki, bizim üçün sürpriz alındı. Yeni ildə isə bizə özümüzü ən yaxşı tərəfdən göstərməliyik. Təsnifat mərhələsinin son 3 oyunundan maksimum nəticəylə ayrıla bilsək, deməli bizim üçün hər şey yaxşı qurtaracaq.
