2 yanvar 2011 01:22
Yerlilərlə əcnəbilər arasında fərq yoxdu
Cari mövsümün gedişində Premyer Liqa klublarında bir sıra baş məşqçi istefalarının şahidi olsaq da, 6 yerli, eyni sayda da əcnəbi baş məşqçi ilə yola çıxan elita təmsilçilərimizdəki bu göstərici yenə olduğu kimi qalmaqdadı. Azerisport.az xəbər verir ki, Premyer Liqada 2010/2011 mövsümündə qış fasiləsinə kimi 14 baş məşqçi fəaliyyət göstərib.
19 tur içində, 12 komandadan cəmi 2-də baş məşqçi dəyişikliyinə əl atılarkən, digər 10 komanda qış fasiləsinə qədərki dövrü mövsümə başladıqları mütəxəssislərlə tamamladılar. İstefaya göndərilən 2 baş məşqçidən də biri yerli, digəri isə yerli olub. Maraqlıdı ki, onları da fərqli ölkələrin təmsilçiləri əvəzləyib. Yəni yerli mütəxəssisin yerinə gətirilən əcnəbi olubsa, legioner mütəxəssisi də yerli çalışdırıcı əvəzləyib.
Bu mövsüm Premyer Liqada iz qoyan hələ ki, 7 yerli baş məşqçi olub. Onlardan 5-i mövsümün əvvəlindən çalışır. Mövsümün əvvəlindən işə başlayanlardan yalnız Sakit Alıyev 7-ci turdan sonra istefa vermək məcburiyyətində qaldı. Daha bir yerli baş məşqçi isə `Muğan`ın çalışdırıcısı Bəhmən Həsənovdu ki, o da 14-cü turdan etibarən fəaliyyətdədi. Maraq üçün onu da əlavə edək ki, Alıyevin istefasından sonra `Turan` 2 tur baş məşqçisiz qaldı ki, o dövrdə də Tovuz klubunu köməkçi məşqçilər - Nizami Ocaqverdiyevlə Elxan Abdıyev oyuna çıxarıb.
Elə eyni sayda da (7) əcnəbi baş məşqçinin işiylə tanış olmuşuq ki, onlardan da 5-i mövsümün əvvəlindən çalışır. Mövsümün əvvəlindən işə başlayanlardan yalnız Almir Hurtiç qış fasiləsinə kimi postunda qala bilmədi və 13-cü turda `Muğan`la yollarını ayırdı. Revaz Dzodzuaşvili isə 10-cu turdan `Turan`ın sükanı arxasına keçmişdi. Düzdü, artıq qış fasiləsi start götürən kimi, onunla da yollar ayrılıb və Tovuz klubunun baş məşqçisi Naci Şensoy olacaq.
Neftçi: Arif Əsədov (19)
Xəzər Lənkəran: Mirça Rednik (19)
AZAL: Nazim Süleymanov (19)
İnter: Kaxaber Sxadadze (19)
Qarabağ: Qurban Qurbanov (19)
Qəbələ: Toni Adams (19)
Bakı: Vinfrid Şefer (19)
Gəncə: Fuad İsmayılov (19)
Muğan: Almir Hurtiç (13), Bəhmən Həsənov (6)
Turan: Sakit Alıyev (7), Revaz Dzodzuaşvili (10) (komandanı digər iki oyuna 1 dəfə Nizami Ocaqverdiyev, 1 dəfə isə Elxan Abdıyev çıxarıb)
Simurq: Qyoko Haciyevski (19)
MOİK: Ramil Əliyev (19)
