3 yanvar 2011 18:52
`Mersin İdman Yurdu` İlqar Qurbanovla yollarını ayırdı
Türkiyənin Bank Asiya birinci liqasında çıxış edən `Mersin İdman Yurdu` klubu 6 futbolçuyla yollarını ayırıb. Azerisport.az xəbər verir ki, baş məşqçi Nurullah Sağlamın rəhbərliyə təqdim etdiyi siyahıda millimizin keçmiş üzvü İlqar Qurbanovun da adı var.
Belə ki, gəldiyi gündən bəri daha çox millimizin sabiq müdafiəçisi Ernani Pereyraya şans verib, İlqarı ehtiyatda saxlayan Sağlam, dövrələrarası fasilə dövründə onu komandadan uzaqlaşdırmağa qərar verib. Nəticədə rəhbərlik Mehmet Budak, Musa Kuş, Sertaç, Birol və Bujorla yanaşı, Qurbanova da özü üçün yeni klub tapmaq tapşırığı verib. Nurullah Sağlam bu oyunçularla daha çalışmayacaqlarını dilə gətirərək, ilk dövrədəki çıxışlarına görə, onların hər birinə təşəkkürünü bildirib.
Qeyd edək ki, Yüksel Yeşilovanın dövründə daha çox Ernani ehtiyatda qalıb, İlqar oynasa da, Sağlamın gəlişindən sonra hər şey dəyişdi. Nəticədə əsas heyətə düşə bilməməsinə görə baş məşqçiylə mübahisə də edən İlqar görünür məhz həmin hərəkətinə görə komandadan uzaqlaşdırılıb.
