4 yanvar 2011 19:22
GS-ın yeni stadionunda `Fener`in şərfinin asılması qalmaqala səbəb oldu (FOTOLAR)
Türkiyə Superliqasında çıxış edən bütün klubların prezidentləri bu gün `Galatasaray`ın prezidenti Adnan Polatın dəvəti ilə yanvarın 15-də açılışı planlaşdırılan “Türk Telekom Arena”nı ziyarət ediblər. Azerisport.az xəbər verir ki, Türkiyə Futbol Federasiyasının vitse-prezidentlərindən Lutfi Arıboğanın da qatıldığı tədbirdə yalnız `Trabzonspor`un başqanı Sadri Şener iştirak edə bilməyib ki, onu da digər klub rəsmilərindən biri əvəzləyib.
Klub prezidentləri stadionu gəzərək, son durumla yerindəcə tanış olublar. Məlum olub ki, hələ bəzi işlərin tamamlanmasına zaman lazımdı. Həmin işlərin ayın 15-nə kimi tamamlanıb-tamamlanmayacağı maraqla gözlənilir. Lakin prezidentlərin bu səfəri zamanı daha maraqlı bir olay yaranıb ki, bu da `Galatasaray`la `Fenerbahçe` arasında növbəti qalmaqala səbəb olub.
Belə ki, arenada çalışan iki fəhlənin elə də isti münasibətlərə malik olmayan bu iki klubun şərflərini arenada yanaşı asmaq istəməsi qalmaqal yaradıb. Onlar bu istəklərini dostluq örnəyi olaraq həyata keçirmək istəsələr də, həmin hadisəyə şahidlik edən təhlükəsizlik əməkdaşlarından birinin `Fenerbahçe`nin şərfini dartaraq fəhlənin əlindən alması diqqətlərdən yayınmayıb. Türkiyəli həmkarlarımız həmin anı fotoşəkillərə həkk etməyə də nail olublar.
