5 yanvar 2011 01:22
Ramiz Məmmədovun komandasında erməni futbolçu
Ramiz Məmmədovun baş məşqçi təyin olunduğu Qazaxıstanın `Atırau` klubu artıq Antalyadadı. Azerisport.az xəbər verir ki, həmyerlimiz yeni komandası ilə Türkiyədə yanvarın 21-dək təlim-məşq toplanışında olacaq.
`Qəbələ`nin keçmiş baş məşqçisi yeni klubunda uğur qazanmaq üçün ilk addımlarını düzgün atmalıdı. Bu yolda onun `Atırau`nun heyətini lazımi şəkildə gücləndirməsi vacib əhəmiyyət daşıyır.
Artıq `Atırau`nun Antalyadakı təlim-məşq toplanışına baxışa gələn futbolçular da var. Onların da əksəri məhz yerli klublarda top qovan qazax oyunçulardı. `Okjeptes`in üzvü Daniyar Kenjexanovun, `Jetısu`nun oyunçusu Viktor Kovalevin, `Kaysar`lı Yeqor Azovskinin, `Aktobe`dən gələn Denis Rodionovun, həmçinin `Ordabası`dan ayrılan Yevgeni Levinlə Mardan Tolebekin `Atırau`ya keçidinə məhz Məmmədov qərar verəcək. Onlarla yanaşı, baxışa 1 makedoniyalı müdafiəçinin, həmçinin 1 bolqarıstanlı hücumçunun gələcəyi gözlənilir.
Qeyd edək ki, Ramiz Məmmədov yeni komandasında azərbaycanlı futbolçulara da yer ayırmağı planlaşdırır. Hələ bir neçə gün öncə saytımıza müsahibəsində buna işarə vuran həmyerlimizin `Atırau`ya hansı futbolçuları aparacağı isə maraqla gözlənilir. Sadəcə bir maraqlı məqam var ki, Qazaxıstan klubunun heyətindəki futbolçulardan biri də ermənidi. 27 yaşlı hücumçu Tiqran Karabaxtsyanın heyətdə qalıb-qalmayacağı, qalarsa Məmmədovun, eləcə də mümkün transferi gündəmdə olan 2 futbolçumuzun onunla necə münasibət quracağı sual doğurur.
