6 yanvar 2011 13:18
Şefer: Kiminsə məni əvəzləyəcəyi vecimə deyil
`Bakı`nın almanyialı baş məşqçisi Vinfrid Şefer komandadan vaxtından əvvəl istefaya göndəriləcəyi ilə bağlı klub rəsmilərinin açıqlamalarına münasibət bildirib. Azerisport.az xəbər verir ki, almaniyalı mütəxəssis “Futbol+” qəzetinə açıqlamasında maraqlı fikirlər söyləyib.
Ailəsiylə birgə İsveçrədə istirahətdə olduğunu deyən Şefer, klubun baş meneceri Zeynal Məmmədovun onunla görüşmək üçün Almaniyaya getməsindən də xəbərsiz olduğunu bildirib: “Zeynal Məmmədovun harda olduğunu bilmirəm. Almaniyadan kənarda istirahət etməyimdə əsas məqsəd dincəlmək həvəsimdir. Axı, qarşıda bizi gərgin oyunlar gözləyir. Hazırkı komandamla müqaviləm davam etməkdədir. İnanıram ki, “Bakı” “altılığ”a vəsiqə qazanmaqla sonda ilk “üçlük”də yer alacaq. Ən pis halda isə kuboka sahib çıxacağıq. Kiminsə məni əvəzləyəcəyi vecimə deyil. Mən bu haqda, ümumiyyətlə, düşünmürəm. Həmin məşqçi Bakıya hansı məqsədlə gəlibsə, işi uğurlu olsun. Mən bir şeyi bilirəm ki, rəhbərliyin qarşıma qoyduğu hədəfə çatmaq üçün çalışıram”.
