6 yanvar 2011 15:51
Millimizin qrupunda hakim rüşvətxorluğu təsdiqini tapdı
Lixtenşteyn və Finlandiya milli komandaları arasında DÇ-2010-nun seçmə mərhələsi çərçivəsində keçirilən oyunun hakimini almaqda ittiham olunan şəxs ifadə verib. Azerisport.az xəbər verir ki, bu böyük qalmaqalın əsas təşkilatçısı kimi saxlanılan Ante Sapina Bosniya və Herseqovinadan olan hakim Novo Paniçi necə ələ aldığını açıqlayıb.
Sapina bildirib ki, Sarayevo otellərinin birinin yaxınlığında hakimlə görüşərək məsələnin detallarını razılaşdırıb və ona “əməyinin” müqabilində 40 min avro rüşvət verib. 2009-cu il sentyabrın 9-da baş tutan qarşılaşma 1:1 hesabı ilə nəticələnib və hər 2 qol fasilədən sonra vurulub ki, sifarişçilərə də məhz bu lazım imiş. Qollardan biri isə hakimin heç nədən təyin etdiyi penalti nəticəsində baş tutub. Onun bu etirafları Paniçin ömürlük futboldan kənarlaşdırılmasının layiqli cəza olduğunu isbatlayıb.
Qeyd edək ki, Almaniyanın Bohum əyalət məhkəməsində ifadə verən xorvat əsilli Sapina başqa etiraflarda da bulunub. O, məhz həmin oyuna təyinat alan UEFA nümayəndəsinə də 50 min avro rüşvət verildiyini iddia edib. Sapina həmçinin bu hakimdən daha sonra U-21-lər arasındakı Avropa çempionatının İsveçrə - Gürcüstan matçında da istifadə etdiklərini söyləyib.
Qeyd edək ki, Lixtenşteyn və Finlandiya DÇ-2010-un seçmə mərhələsində millimizlə eyni qrupda qərarlaşmışdı.
