6 yanvar 2011 00:06
Meydan sahiblərindən sonra ən yüksək göstərici millimizdə
Rusiyanın Sankt-Peterburq şəhərində təşkil olunan Valentin Qranatkinin xatirəsinə həsr olunmuş beynəlxalq turnirin 8 iştirakçısından biri olan Azərbaycanın U-19 millisi ən çox azarkeş toplayan ikinci komandadı. Azerisport.az xəbər verir ki, komandamızın oyunlarına gələn azarkeşlərin sayı yalnız meydan sahibi olan Rusiya U-19-nun görüşlərini izləyənlərdən geri qalır.
Məsələ burasındadı ki, A qrupunda yer alan Rusiyanın yeniyetmələrdən ibarət komandasının Finlandiya ilə ilk görüşünü 3 min, ikinci oyun günündə baş tutan Latviya ilə qarşılaşmasını isə 4 min tərəfdar izləyib.
Vəli Qasımovun yetirmələrinin Ukrayna ilə 1:1 hesabıyla başa çatan ilk görüşü də digər qarşılaşmalar kimi futbolsevərlərin diqqətini cəlb etməyib. Lakin ikinci oyun günündə baş tutan Belarusla qarşılaşmanı 2 min azarkeş izləyib ki, bu da meydan sahiblərinin oyunlarında qeydə alınan azarkeş sayından sonra ən yüksək göstəricidi. Digər komandaların görüşlərində isə ən yüksək azarkeş sayı 1500 nəfər olub.
Komandamızın son oyununu izləməyə gələn azarkeşlərin çoxluğu millimizin baş məşqçisi Vəli Qasımovun da diqqətindən yayınmayıb. Belə ki, o, komandamızı dəstəkləməyə gələn azərbaycanlı futbolsevərləri qolla sevindirə bilmədiklərinə təəssüfünü gizlətməyib. Onun oyundan sonra dilə gətirdiyi həmin fikirləri ilə sizi də tanış edirik:
“Hər iki komandanın qol vurmaq üçün şansları oldu, lakin nədənsə futbolçular heç bir epizodda bu şanslardan yararlana bilmədilər. Hardasa qapıçıların da öz ustalığını göstərməsi öz sözünü dedi. Hələ matçdan öncə bizə demişdilər ki, tribunalarda bizim çox sayda azarkeşimiz olacaq. Əlbəttə, belə azarkeş dəstəyi mənim yığma komandam üçün çox böyük atmosfer yaradırdı. Ancaq əfsuslar olsun ki, həmin azarkeşləri qolla sevindirə bilmədik”.
Sonda onu da qeyd edək ki, yığmamızın yer aldığı B qrupunda Belarus, Ukrayna və Çin, A qrupunda isə meydan sahibi Rusiya ilə yanaşı Finlandiya, İtaliya və Latviya milliləri yer alır.
