7 yanvar 2011 15:21
Araz Abdullayevin `Everton`a keçidi həllini tapdı
`Neftçi` və `Everton` təmsilçilərinin Bakıda keçirilmiş mətbuat konfransı Araz Abdullayevin ingilis klubuna keçidi ilə bağlı bütün məsələlərə aydınlıq gətirib. Azerisport.az xəbər verir ki, `Everton` futbolçumuzla müddəti ictimaiyyətə açıqlanmayan müqavilə bağlayıb.
`Everton` təmsilçisi Devid Harrison bildirib ki, bu, uzunmüddətli müqavilədi: “Müddəti açıqlaya bilmərəm. Ancaq bu, uzunmüddətli müqavilədi. Bir il qabaq Azərbaycan və Şotlandiya gənclər yığmalarının (U-21) oyununda gördüyümüz Araz Abdullayev xoşumuza gəlir. Biz bu gənci klubumuzda istəyirik. Arazın nə vaxt əsas heyət oyunçusu olacağını demək çətindir. Hər şeyin onun özündən və `Neftçi`dən də asılıdı. Abdullayev bizə fevralda gələcək və iki həftəlik toplanış keçəcək. Bundan sonra biz, klubun baş məşqçisi Devid Moisin fikrini biləcəyik”.
Həmçinin məlum olub ki, bundan sonra sözügedən klublar əməkdaşlıq edəcəklər. “Biz bir çox məsələlər üzrə `Neftçi` ilə əməkdaşlıq edəcəyik. Məsələn, sizin məşqçilər İngiltərəyə gələrək təcrübə keçə biləcək”, deyə Harrison vurğulayıb. Həmçinin o, bildirib ki, Araz Abdullayev yığmada çox oynamalıdır ki, İngiltərə vizası ilə bağlı problem olmasın.
`Everton`un daha bir təmsilçisi Con Merdok Arazın oyunçu potensialına toxunub: “Klubumuzda kadrlarımızı yetişdirmək ənənəsi var. Biz bununla son 15 ildə uğurla məşğul oluruq. Ancaq Arazın yaxşı potensialı var. O, özünü göstərə bilər. Onun 18 yaşı var və onu tələsdirmək lazım deyil”.
Mətbuat konfransında o da məlum olub ki, Araz `Neftçi`yə martda qayıdacaq: “Biz `Everton`dan Arazı `Neftçi`yə icarəyə verməsini istədik. Bildiyiniz kimi Flavinyo hələ bərpa olmayıb və qarşıdakı oyunlarda bizə çətin olacaq. Buna görə də Araz mövsümün sonuna qədər bizimlə qalacaq”, deyə `Neftçi`nin vitse-prezidenti Tahir Süleymanov bildirib.
Nəhayət, günü qəhrəmanı jurnalistlərlə danışıb: “Artıq ingilis dilini öyrənməyə başlamışam. İngiltərə Premyer Liqasında ilk azərbaycanlı olmağım xoşdur. Ancaq ümid edirəm ki, bundan qabaq `Neftçi`ni çempion edəcəyəm”, deyə Araz bildirib.
