8 yanvar 2011 12:28
Əsgər Abdullayev: Biz özümüz bu işdə maraqlı olmalıyıq
Azərbaycan yığma komandasının və AZAL-ın sabiq çalışdırıcısı Əsgər Abdullayevin azerisport.az saytına müsahibəsi.
- 2010-cu il artıq arxada qaldı. Hansı hadisələr sizin üçün daha yaddaqalan oldu?
- Əlamətdar hadisələr çox olmadı. Ancaq `Qarabağ` bizi sevindirə bildi. Onlar Avropa Liqasında 3 mərhələ adladılar ki, bu da bizim futbolda bir ilk idi, yeni tarix yazdılar. Digər yaddaqalan hansısa hadisəni xatırlamıram.
- Hazırda hamını düşündürən əsas məsələlərdən biri də bizim mütəxəssislərin niyə ölkədən kənarda işləməməsidi. Nə problem var sizcə?
- Ən böyük problem reklam işləriylə bağlıdı. Bizim məşqçilərin nə reklamı var, nə də menecerləri. Onlar necə xarici klublarla danışıqlar apara bilərlər ki, reklam istəmirlər. İndiki dövrdə hər şey reklamdan asılıdı. Siz bilmirsiniz xaricdəki məşqçilərin menecerləri necə işləyirlər. Onlar öz müştərilərini necə lazımdı təqdim, reklam edirlər. Elə ölkəmizə də elələri az gəlmir. Buna görə də azərbaycanlı məşqçilər diqqətdən kənarda qalmış olur. Təkcə ölkə xaricində yox, həm də Azərbaycan miqyasında.
- Sizə hansısa xarici klubdan dəvət gəlib?
- Son bir ildə heç bir təklif almamışam. Yalnız `Olimpik`də (indiki AZAL – red.) çalışan dövrdə mənimlə bir klub maraqlanmışdı. Türkiyənin birinci divizion təmsilçisi idi. Ancaq mən onda həmin təklifi qəbul etmədim. Həmin il mənim komandam çempionluğa oynayırdı, sonda ikinci oldu. Buna görə də mən hər şeyi yarımçıq qoyub getmək istəmirdim. Türkiyə yeganə ölkədi ki, bizim məşqçilər özlərini göstərə bilərlər.
- Bəs siz niyə xarici menecerlərlə işləmirsiz?
- Məşqçilərin özləri bu işdə maraqlı olmalıdırlar. Biz menecerlərə hansı ölkələrdə, klublarda işləyə biləcəyimizi deməliyik ki, onlar da bu yolda bizlərə bələdçi olsunlar. Şəxsən mənim fikrimcə, bizdə əla mütəxəssislər var. Sadəcə onların reklam edəni yoxdu.
- Ramiz Məmmədovun `Atırau`ya gedişi haqda nə deyə bilərsiz?
- Onu təbrik etmək istəyirəm. Bu, bizim üçün yaxşı xəbərdi. Düşünürəm ki, xaricdə yeganə problem dil bilməməklə bağlı ola bilər. Ancaq Qazaxıstanda hər kəs rus dilində danışdığından, onun belə problemi də olmayacaq. Hesab edirəm ki, Ramiz Məmmədov ümidləri doğrulda bilər.
- Xarici məşqçilərdən hansıların Azərbaycandakı işini bəyənmisiz?
- Gizlətmirəm ki, komandasına nəticə verən məşqçilər olub. Lakin onlar Azərbaycan futboluna yeni heç bir şey verməyiblər. Çoxları bioqrafiyasına görə fərqlənir. Ancaq zaman göstərir ki, onlar ümidləri tam doğrultmur. Heç kimi keçmişinə güvənib, dəvət etmək olmaz.
- Siz birinci divizionda işləyərsiz?
- İş işdi. Baxır hansı klubda. Əgər komanda elə belə futbol oynamaq xatirinə meydana çıxırsa, o, mənlik deyil. Əgər klub Premyer Liqaya yüksəlmək istəyirsə, onda o komandanı götürərəm. Axı sən belədə sən sıfırdan komanda qurursan, necə deyərlər, yeni səhifə açmış olursan. Əgər mənə belə bir təklif gəlsə, fikirləşərəm.
- Öz keçmiş komandanızın çıxışı haqda nə deyə bilərsiz?
- AZAL mövsümə yaxşı başlayıb və düşünürəm ki, onlar bu gedişlə mükafatlar uğrunda mübarizə apara bilərlər. Fevralda onları çətin oyunlar gözləyir. Çox şeyi məhz həmin oyunlar həll edəcək. Və mən bir şeyi də əlavə etmək istərdim ki, AZAL-ı çempionatın sürpriz komandası hesab edənlərlə qətiyyən razılaşmıram.
